تامر أمين ينفعل على ظاهرة الفود بلوجر: «هو أنت عشان واخد فلوس تطلع تقول الأكل حلو»

انتقد الإعلامي تامر أمين، انتشار ظاهرة «الفود بلوجر» على مواقع التواصل الاجتماعي، مشيرا إلى أن أعدادهم أصبحت كبيرة للغاية.

وقال أمين خلال برنامج «أخر النهار» المذاع على قناة «النهار»: «أنا من الناس اللي بتحب الأكل؛ في ناس بتاكل عشان تعيش وناس بتعيش عشان تاكل؛ وأنا من الناس التانية شوية؛ أنا بحب الاكل وذواقة وأكيل».

وأضاف: «القصة اللي عايز أتكلم عليها هي الظاهرة الجديدة اللي بقت منتشرة على السوشيال ميديا ومواقع التواصل الاجتماعي؛ هما الفود بلوجرز؛ وهما أي حد بيقرر ينزل يروح المطاعم ويديلك رد فعل عن تجربته على السوشيال ميديا».

وتابع: «في فود بلوجرز مشهورين وفي فود بلوجرز كويسين وتحس أنهم بيدو تست الأكل بجد وبيدي ريفيو مظبوط؛ أنا بس ليا ملاحظتين؛ الملاحظة الأولى أن عددهم كتر أوي؛ من ست شهور كانوا 5 أو 6 أو 10 دلوقت تقريبا بنتكلم على ألافات».

وواصل: «دلوقت أي شاب جاب تليفون قالك أنا جعان أنزل اضرب لقمة وأقول لصاحب المحل أنا فود بلوجر عشان مدفعش ونكمل على كده؛ في ناس مشهورة وبتروح تاخد فلوس من المطعم ودا بيزنس؛ بيروح ياخد فلوس من المطعم ودا حقك دا بيزنيس طالما المطعم بيكسب ترويجيا وتسويقيا والبلوجر بيعمل إعلان مدفوع الأجر للمطعم».

وأوضح: «أنا خايف أن كل الشباب يروحوا يشتغلوا فود بلوجر ويسبوا أشغالهم بقي؛ أتمنى الموضوع ميبقاش بزنس بس يبقي في صدق وأمانة لأن خد بالك يا فود بلوجر أن ده يضرب في مصداقيتك بعد كده؛ لما شفت كذا بلوجر وجربت أطلب من المحل اللي شوفت الفيديو بتاعه لقيت حاجة تانية خالص غير اللي طلعت في الفيديو».

وأكمل: «أولا شكل الأكل غير اللي كان في الفيديو تماما؛ ثانيا أنا باكل لقمة من هنا واتفرج على الفيديو وهو بيقول الله دي بتدوب وأنا باكلها والاقيها بتشد أنا رجاء أن يبقي في مصداقية اعمل شغلك بس في النهاية لما تلاقي الأكل وحش ترفض تعمل ريفيو».

واختتم: «في حد كويس أو اتنين كده بيطلعوا يقولوا الوحش وحش يقولك أنا جاي وبعمل ريفيو وباخد فلوس بس الأكل أهو مش عارف أيه الفراخ مش نضيفة العيش بايت احترمتهم جدا واخد كلامه مصدق».