لو رجع بيا الزمن هرقص وأعبر عن فرحتي.. أخر تصريحات صاحبة فيديو تخرج أسيوط

صرحت "سمر عنتر" أبنة مركز القوصية بمحافظة أسيوط ، صاحبة ترند فيديو التخرج  بتصريحات خاصة لموقع "بصراحة" من خلال البث المباشر ، ترد بها على منتقديها  قائله « العادات والتقاليد انا مش أول ولا اخر واحدة رقصت ، وأسيوط بدأت تطور شوية ، ومش أنا بس اللي رقصت وكل البنات كانت بترقص وبتقسم ، فمتقليش عادات وتقاليد » .

أضافت صاحبة ترند التخرج معبرة  عن غضبها من التعليقات السلبية  والانتقادات الموجهة إليها ، بعد انتشار فيديو خاص بها وهي ترقص في حفلة تخرجها بكلية التربية الرياضية بجامعة أسيوط ، « لو رجع بيا الزمن هرقص بجد و أعبر عن فرحتي لأن ده مكنش رقص عشان أنا مكنش ليا نفس أرقص ، وأنا كنت مع أهلي مش لوحدي » .

واستكملت "سمر" تصريحاتها « اتفجئت إن لقيت البنات هما اللي عملوا كدا قبل الأولاد ، ولقتهم معلقين هي ماشية كدا ليه هي واخده برشام صراصير ! »

واضافت "سمر" في تصريحاتها « أهلي دايمًا واقفين جمبي ومعايا وبيشجعوني وكانوا مبسطوين وفخورين بيا ، وأهلي ربوني أحسن تربية ، وأنا واحدة دايمًا ناجحة ومميزة ، ولازم الناس تتطور في التفكير».

وأكدت "سمر" خلال التصريحات انها بالفعل تقدمت ببلاغ رسمي بمباحث الأنترنت لكل من أخطا في حقها وفي حق عائلتها قائله « قدمت بلاغ بمباحث الأنترنت وخد اسكرينات لكل اللي شتمني وغلط فيا ، ومسامحه كل واحد بعتله رسالة بحذف الفيديو أو الكومنت واستجاب لكلامي».
وتفاجئت "سمر" من انتشار الفيديو على هذا النطاق الواسع حتى اصبح ترند « أنا مكنتش متوقعة إن الفيديو هينتشر بالشكل دا أو يطلع ترند ، أنا بالنسبالي لما بنزل حاجه على صفحتي الشخصية أعلى مشاهدات بتوصل عندي من 100 لـ 150 الف مشاهدة فقط بس مكنش بالشكل اللي حصل دا ولا الإنتقادات اللي شوفتها دي» 
وأضافت "سمر" من خلال التصريحات « انتشار الفيديو كان من خلال الشركة المسئولة بتصوير الحفلة ، واللي صور كلمني قبل ما ينشر الفيديو وقالي الفيديو بتاعك حلو وهنزله وهعملك منشن عليه وأنا وافقته عشان عايزه افرح زي أي حد ، ومكنتش اعرف انه بسببه هتحصل الضجة الكبيرة دي ، وبعد كثرة المشاهدات والانتقادات طلبت من الشركة تقفل الكومنتات وبالفعل قفلوها ، ولكن استمر الوضع كما هو عليه ، فطلبت منهم يحذفوا الفيديو خالص لما الموضوع زاد عن حده».

وهاجمت "سمر" سكان الوجه البحري قائله « بقول الناس اللي في مصر ، احنا مش فلاحين واحنا ناس متعلمة ومطلعين دكاترة ومهندسين ومدربين ، ثم ايه المشكلة لما نكون فلاحيين دي حاجه متعيبش خالص بالعكس دا شرف لينا كلنا ، واسيادنا فلاحين وجدتي فلاحه فمفيش مشكلة في كدا».

ووضحت "سمر" عن موقفها في الفيديو الذي نشرته على صفحتها الشخصية بموقع التواصل الإجتماعي "فيس بوك" والذي كانت ترد فيه على المنتقدين ولكن كان بألفاظ غير لائقة فقالت « لما طلعت رديت على الناس في صفحتي من خلال فيديو قصير وشتمت فيه بألفاظ مش كويسة ، فدا كان غصب عني من كتر الشتايم والإنتقادات اللي قريتها واللي جتلي ، فكنت متعصبة ومكنتش عارفه أنا بقول ايه ، وبعد ما نشرته بنصف ساعة حذفته ، وانا بعتذر لكل الناس المحترمة اللي بتابعني ، ولكن ردي دا كان للناس اللي شتمتني».

يذكر أن الفيديو لاقى تفاعلات ومشاهدات كثيرة على مواقع التواصل الإجتماعي منهم المؤيد ومنهم المعارض من أجل تمسكهم بالعادات والتقاليد والأصول التي تربوا ونشأوا عليها.