شقيق شيرين عبد الوهاب: أختى مقدمة فيا بلاغ للنائب العام والتحقيقات هتثبت صحة موقفى

نشر محمد شقيق شيرين عبد الوهاب عبر حسابه بموقع فيس بوك، توضيحا حول موقف شيرين من المسئول عن صفحاتها على السوشيال ميديا، حيث كتب: "أدى الشركة اللى هى بتقول عليها ما تعرفش حاجة عنها ولا إنها اشتغلت معاهم ولا إنها تعرف إنى مضيت معاهم. الصورة على حسابها على إنستجرام وهى بتشكرهم على شغلهم معاها من 2018.. التحقيقات إن شاء الله هتثبت بالأدلة وبإظهار العقد صحة موقفى".

وأضاف شقيق شيرين عبد الوهاب: "محمد الشاعر ده أشهد قدام ربنا إنه من أنضف الناس اللى هى اشتغلت معاهم، وشهادتى فيه مجروحة وهو معروف مين وابن مين من أكبر عائلات مصر وناس سمعتهم سبقاهم". فيما رد على أحد المعلقين قائلا: "أختى دى مقدمة فيا بلاغ للنائب العام اهدى كدة الله يباركلك".

وكانت أزمة شيرين عبد الوهاب مع أسرتها وبالتحديد شقيقها سلسلة مستمرة، فبعد انتشار تسريبات صوتية لطليقها حسام حبيب، يتحدث فيها عن استغلال أهل شيرين لها، وتأكيدها هى تلك الاتهامات التى نسبها حسام لشقيقها، خلال بيان صحفى، خرج شقيقها عن صمته، كاشفا أن النيابة العامة قامت بالفعل بحفظ كل الاتهامات التى نسبت إليه سابقا إدارياً.

شقيق شيرين يكشف موقف النيابة العامة من الاتهامات

ونشر محمد عبد الوهاب، شقيق الفنانة شيرين عبد الوهاب، صورة من حكم النيابة بحفظ القضية، عبر حسابه على "فيس بوك"، معلقا عليها: "كل واحد عنده قدرة على تحمل الأذى لكن للقدرة دى حدود، ده قرار النيابة العامة بالحفظ إدارياً فى كل الاتهامات اللى اتوجهت ليا بتاريخ 19/12/2022 يعنى من سنتين".

وأوضح محمد عبد الوهاب تلك الاتهامات، متابعا: "إيه هى بقى الاتهامات دي؟ كسر الضلع والعشرين راجل اللى دخلت بيهم على أختي! وطبعا موضوع السكينة! واتسألت على التوكيل بتاعى وبتاع أمى من وكيل النيابة المحترم وكله مثبت، س سؤال ج جواب، التوكيل اللى بتقول إن أنا أسأت استخدامه!".

كما ذكر: "وده إن دل على شيء فهو يدل على إنى مش عايز أختى شكلها يبقى وحش قدام الناس وقدام جمهورها والأهم أمى اللى كنت مفهمها إن بنتها اتنازلت، وأنا أستحمل أى حاجة إلا إنها تتوجع فى ولادها، وبناء عليه رضيت بالظلم لوحدى لكن الحقيقة غير كدة، أنا اتطلبت فى النيابة واتسألت رسمى وتم إخلاء سبيلى من النيابة على ذمة القضية لحد ما اتحفظت القضية".

واختتم حديثه: "بس انتى بقى بشطارتك وباللى حواليكى اللى خسروكى نفسك وأهلك، خليتينى النهاردة أطلع أقول جزء من الحقيقة للناس رغم إن ده آخر حل كنت أحب ألجأ ليه، وده حق ربنا لا ظلم ولا افترى، ونفس الكلام اللى من سنتين بيتعاد تانى معرفش لمصلحة مين، مع إنى بعيد عنك وعن حياتك من سنين قبل الواقعة وسنتين من بعدها، وده قرار النيابة العامة الموقرة فى الافتراءات اللى اتوجهتلى، مش بيان من محامى، وأى حاجة هرد بيها هتكون مستند حكومى عليه ختم النسر".