حمو بيكا يدافع عن عصام صاصا: كفاية مزايدات ملهاش لازمة

أكد مؤدي المهرجانات حمو بيكا أن زميله عصام صاصا لست بمجرم، أو مؤذي، لافتًا أنه لا يحاول المشاركة في التريند، وأنه على علاقة به منذ سنوات.

ونشر حمو بيكا عبر صفحته الرسمية بموقع تبادل الصور والفيديوهات "إنستجرام" صورة لعصام صاصا، وعلق عليها عليها قائلًا: "عصام صاصا عمره في حياته ما كان مؤذي أو شخص مش كويس وأنا مش بكتب الكلام ده عشان أظيط في الظيطة.. أنا ك حمو بيكا أعرف الراجل ده من سنين السنين كمان".

بيكا يدعم عصام صاصا

وأضاف بيكا: "خبط واحد بعربيته قضاء وقدر يا ريت بقى الناس بتاعت التيك توك والصحافيين والناس اللي بتظيط دي متركبس المركب بالشقلوب.. وتفضل تقول كلام محصلش.. الراجل ده دلوقتي في محنة وفي أكتر من شخص بيطلعوا يعملوا فيديوهات ملهاش أي تلاتين لازمة".

وأضاف حمو بيكا: "ملكمش الحق أنكم تتكلموا وملكمش الحق أنكم تطلعوا تجيبوا سيرتو بأي حاجة.. أنا شايف كمية فيديو على التيك توك بجد حاجة تقرف حاجة تدل على إن أحنا شخصيات معندهاش مبداء.. وشخصيات مقرفة".

وتابع: "أي كان جريدة أي أو الصحفيين اللي بيمشوا بالتليفونات في أي حتة دول أنتم ملكمش الحق أنكم تتكلموا في أي حاجة أصلًا ومين أداكم الحق للكلام ده بس بجد أنتوا أبشع مما تتصوروا.. الراجل مات وده نصيبو الله يرحمو ويرحم جميع أمواتنا ولكن المزايدات ملهاش لازمة صدقوني".

وأنهى حمو بيكا تعليقه قائلًا: "الفانون والدولة هما الوحدين اللي ليهم الحق في الكلمة أو في أي حاجة تخص الموضوع يا ريت بقى نهدا ونبطل هري ونهدا كل شوية جريدة تطلعلنا واحدة مبتعرفش تتكلم تفضل تهري في الموضوع.. ربنا يرحم اللي مات برحمتو.. وربنا يرجعلنا عصام صاصا بالسلامة".

تفاصيل حادث عصام صاصا

وجدير بالذكر أن مؤدي المهرجانات عصام صاصا تسبب في جدل كبير بالأيام الماضية، وذلك بعد دهسه أحد المواطنين أعلى دائري المنيب، في شم النسيم الماضي 2024.