صلاح عبدالله: لن أعمل مع كريم عبدالعزيز وأحمد حلمي بعد هذا التصريح.. وعائلة السبكي أنقذت السينما أثناء توقف الصناعة.. وبرامج المقالب سبوبة حلوة وبكره المشاركة فيها

أكد الفنان صلاح عبد الله، رفضه لفكرة النقاب أو ارتداء بناته النقاب وتفضيله الحجاب والاحتشام فقط، قائلا: "حتى اللحظة دي يعنى ايه مقدرش أميز راجل عن ست ولا أخد بالي اللي دخل بيتي راجل ولا ست والحاجات دي بتعمل حساسية ومشاكل مع المتعصبين وناس تشتم لكن احنا تعودنا عليها".

واضاف صلاح عبد الله، خلال حواره ببرنامج "حبر سري"، مع الاعلامية اسما ابراهيم، على قناة القاهرة والناس، "قناعتي النقاب هو كتلة السواد مش زي اسلامي ولو بنت من بناتي قالت لى عايزة تتنقب هتبقى صعبة قوي وهرفض ولو عملت كده هحاول اقنعها لكن لو في إصرار ارتداءه هتبقى مشكلة".

واستكمل: فكرة النقاب بالنسبة لى لبناتي مشكلة وممكن تتحجب وأنا مش مربي بناتي على كده في التزام واحتشام وولدتهم أيضا إنما بحرية مش فرض وانا مؤمن بالحرية".

صلاح عبد الله: لن أعمل مع كريم عبدالعزيز وأحمد حلمي بعد هذا التصريح

أكد الفنان صلاح عبد الله، أنه يتمنى العمل مع كريم عبد العزيز وأحمد حلمي خاصة وأنه لم يقدم معهم أي أعمال فنية سواء في صغرهم أو الان قائلا: "نفسي امثل مع اللى ممثلتش معاهم زي كريم عبد العزيز وأحمد حلمي وحظي قليل أني ممثلتش معاهم حتى وهما صغيرين".

واضاف صلاح عبد الله، خلال حوار ببرنامج "حبر سري"، مع الاعلامية اسما ابراهيم، على قناة القاهرة والناس، أنه عمل مع نجوم سوبر ستارز لكن ممثلش مع كريم وحلم، مضيفا: "وبعد ما قلت هذا التصريح لو جالي شغل مع كريم أو حلمي هعتذر عنه ودي تركيبتي لأني عمري ما قلت نفسي اشتغل مع حد وأنا بحبهم ولكن ممكن يكونوا مش بيحبوني وصعب يكون في حد في الوسط الفني مش بيحبني".

وتابع: "عملت مع محمد إمام في مسلسل هوجان دور حلو ونجح قوي وهو جنبي في السكن ومكتبه جنبي وكنت هطلع ضيف شرف في مسلسل كوبرا بس الظروف كانت بتمنع بسبب زنقة شغل مسلسلات عتبات البهجة والعتاولة".

صلاح عبد الله: عائلة السبكي أنقذت السينما في وقت من الأوقات توقفت الصناعة

أكد الفنان صلاح عبد الله، أن عائلة السبكي أنقذت السينما في وقت من الاوقات وقدم أفلام معروفة بأفلام العيد بخلطة معروفة ثم قلل من استخدام هذه النوعية من الافلام، مشيرا إلى أن السبكي قدموا أفلام مهم شارك هو فيها منها الرغبة والفرح وكبارية.

واضاف صلاح عبد الله، خلال حوار ببرنامج "حبر سري"، مع الاعلامية اسما ابراهيم، على قناة القاهرة والناس، أنه قدم في فيلم الفرح دور صلاح وردة وكان يجسد معاناة الفنان، مؤكدا أن السبكي عندهم اعمال في السينما كثيرة وأنقذت صناعة السينما في وقت لم يكن فيها انتاج افلام، موضحا أن صناعة السينما يعمل فيها آلاف العمل خلف الكاميرا.

وتابع: "السبكي كان بيقدم أفلام في وقت مكنش في انتاج افلام كان هو شغال ولوكيشن التصوير في جيش عمال بيسترزق والناس بتشوف اللى على الشاشة بس ولكن السبكي كان مخلي الحركة دايرة وممكن النقاد في تحفظات ولكن في حالة التشغيل كان مهمة في الصناعة". 

صلاح عبد الله: برامج المقالب سبوبة حلوة وبكره المشاركة فيها

أكد الفنان صلاح عبد الله، كرهه لبرامج المقالب وعدم المشاركة فيها ولكن شارك في أحد البرامج زمان، قائلا: "بكره برامج المقالب ولا اشارك فيها وانا شاركت زمان في بعض برامج المقلب وكانت بسيطة وخفيفة ودلوقتي لا خلاص وهي سبوبة حلوة بس مينفعش اشارك فيها".

وانتقد صلاح عبد الله، خلال حواره ببرنامج "حبر سري"، المذاع على قناة القاهرة والناس، نشر المشاهير لحياتهم الشخصية على وسائل السوشيال ميديا، مؤكدا أن الأجيال الحالية من الشباب تفكيرهم مختلف عن جيله ويستخدمون السوشيال ميديا والهواتف المحمولة بطريقة غريبة.

واستكمل: "مشكلتي مش مع بناتي ولكن مع أحفادي وعندي حفيدين والموبايل حاجة صعبة جدا بالنسبة لهم ولهم طرق وتفكير وطريقة تفكيرهم مختلفة ودماغهم مختلفة".