إسعاد يونس : مش قادرة أتخيل لحد دلوقتِ منطق الموت، ومش قادرة أتخيل إن سمير غانم بقاش موجود

 قالت الفنانة إسعاد يونس: "بيجي أوقات أكون لا أحُتمل، جا لي وقت كنت لما أزعل أبقى كئيبة وخلقة ما تتشافش وبعدين اكتشفت إن دا مش لطيف".

وفاة سمير غانم

وأضافت خلال لقائها ببرنامج "بيج تايم بودكاست" الذي يقدمه عمرو أديب وأصالة بقناة "إم بي سي 1": "في لحظة الناس بتروح وأنا مش قادرة أتخيل لحد دلوقتِ منطق الموت، ومش قادرة أتخيل إن سمير غانم دا نام وغمض عينيه وما بقاش موجود، والحتة دي مجنناني في الحياة".

تجاوز إسعاد يونس الاكتئاب

وتابعت إسعاد يونس: "مش قادرة أستوعب ممارستنا الحياة وبعد كدا نرحل في لحظة، وقررت إني ما أكتئبش ولا أشعر بكآبة لأن عمرنا بينفد وكل لحظة بتروح مش راجعة، حياتنا دقائق وثواني والمشكلة إنها ما بترجعش طيب ليه نزعل ونكتئب".

اللحظات الأخيرة في حياة سهير البابلي

واستطردت: "الفنانة سهير البابلي كانت بتاعة ربنا وقفلتها بتاعة ربنا يعني مسلمة أقدارها، وكنت معاها لحد قبل الوفاة بدقيقة، وعملنا حديث مع بعض لما تعبت أوي وعملت عمليات كتيرة، فرُحت لها ونزلت في رمضان بالعباية ورُحت رايحة لها وعملنا فيديو على السوشيال ميديا وقالت لي احنا هنشتغل وننزل، فقلت لها يلا، بس هي صحيًّا ما كانتش هتقدر، بس كان لازم أقول لها شدي حيلك وقومي بس هي ما كانتش جاهزة، هي ماتت وهي عندها حياة جيدة ومعززة بنتها".