أنا خايب.. أحمد عز يكشف عن وجهه الآخر: من صغري مش الواد بتاع البنات اللي بيلاغي

حل الفنان أحمد عز، ضيفا على برنامج  "بودكاست Big Time" الذي يقدّمه الإعلامي عمرو أديب على قناة "mbc1"، وكشف خلاله عن العديد من الأسرار والتفاصيل الخاصة بحياته الشخصية.

أحمد عز في بودكاست عمرو أديب 

وكشف الفنان أحمد عز عن مخاوفه، قائلا:"المرض أكتر حاجة بتقلقني وطبعاً بخاف من المرض، وأنا عندي فوبيا المرض".

وتابع: "فوبيا المرض اللي عندي مش من لا شيء، لإن أمي الله يرحمها ماتت وقبل ما تموت كنت عارف هي عندها إيه وما قلتش لأبويا ولا إخواتي وهي كان طلبها كده، أنا كنت قريب منها جداً وكانت بتدوّر البيت عادي، وكانت بتاخد العلاج الكيماوي وبعدين ترجع البيت تطبخ وتأكّل وأنا الوحيد اللي عارف، أمي كانت جبّارة".

وعن تلقيبه بالمغرور:"أنا زمان كنت بتشال وأتحط لما يقولوا مغرور، بس لما شوية فهمت ورسيت عرفت إن النجاح وحب الناس ونجاح الأفلام وإن ربنا يسهلّك في ده أنت ملكش فيه حتى لو كنت أعظم ممثل ولكن القصة في إرادة ربنا علشان كده مفيش عندي غرور ومبقتش مغرور".

تصريحات أحمد عز 

وأضاف:"المكانة والنجاح وإن الناس تشوفك مغرور أو تحبّك مش بتاعتك دي بتاعت ربنا، وبعدين الناس فيها اللي مكفيها، مش كل شوية أنزلهم في صور عن حياتي على السوشيال ميديا، أنا مش بحب الطريقة دي، إزاي واحد رايح شغله وطالع عينه ويشوفني وأنا نايم على حمّام السباحة، هيقول لي ده أنت معندكش دم؟!".

وعن إعجاب الفتيات به، قال: "حب البنات ليَّ ما أعرفش سببه، بس ده من كرم ربّنا وحبّ الناس لا يقدَّر بالملايين، بس نقطة حبّ البنات أقسم بالله عمرها ما شغلت تفكيري ولكنها نعمة ربنا يديمها، وأنا أبسط بكتير أوي وأخيب بكتير أوي مما حد يتخيل مش الواد الحلانجي أخيب مما أتخيل وما بعرفش أذوّق الكلام، يعني أنا مش الواد بتاع البنات وده من صغري".