عمرو وهبة يثير الجدل: التيك توك للأسف في مصر فيه إسفاف مع أنها حلال

كشف الفنان عمرو وهبة عن رأيه في اتجاه الفنانين إلى مواقع التواصل الاجتماعي، وخاصة موقع تيك توك، والظهور في بث مباشر بغرض التربح.

وقال عمرو وهبة، في حواره مع الإعلامي هيثم بسام، ببرنامج ورقة في ملف، المذاع عبر شاشة قناة النهار: أنا لما كنت مش عارف آخد فرصتي في التمثيل عن طريق الكاستينج أو العلاقات، قولت طالما الناس مش عارفة تشوفني أوريهم أنا نفسي، وبدأت أعمل فيديوهات أون لاين ومنها ربنا كرمني وبدأت أمثل، ولكن لاحظت مؤخرًا أن كل الفنانين مع إنهم عندهم حضور وأسماء كبيرة في التمثيل بدأوا يلجأوا للسوشيال ميديا والتيك توك وإنستجرام، وهما كده بيكونوا أكثر حضورا مع جمهورهم.

وأضاف: التيك توك للأسف في مصر فيه إسفاف، ولكن هو برا في أوروبا نافذة مهمة جدًا بغض النظر عن الهزار، إحنا للأسف بقى مصنف شوية إنه فيه إسفاف بسبب القضايا والمشاكل اللي حصلت عليه.

وأضاف: السوشيال ميديا نفعتني جدًا وعرفتني على الناس، وفيه ناس متعرفش أعمالي الفنية وبتتفرج على فيديوهاتي على السوشيال ميديا، وناخد منها الإيجابي والسلبي، وعلشان الحياة الشخصية بقت مشاع لكل الناس وعارفين كل حاجة عنك.

وعن توجه الفنانين إلى الظهور في لايفات عبر منصة تيك توك، فعلق عمرو وهبة: أتمنى إني متحوجش إني أعمل ده، ومقدرش أقول إن ده غلط واللي بيعمله عنده التزامات، واللي بيعمله أول واحد عارف إن دي حاجة غلط ومش مبسوط بيها، ولكن هي بقت وسيلة تربح حلال طالما بتعملها بطريقة محترمة قدر الإمكان.

برنامج ورقة في ملف

الجدير بالذكر أن الإعلامي هيثم بسّام يقدم برنامج ورقة في ملف عبر شاشة قناة النهار، ويذاع البرنامج يوم الخميس من كل أسبوع في تمام الساعة الرابعة عصرًا.