زينة تتغزل في محمد رمضان: راجل هايل وبتاع شغل وحنيّن وأظرف الحاجات اللي حصلتلي في جعفر العمدة اني إتعرفت

تحدثت الفنانة «زينة»عن تعاونها مع الفنان محمد رمضان في مسلسل جعفر العمدة، الذي حقق نجاحا كبيرا خلال فترة عرضه ضمن سباق مسلسلات رمضان 2023، مشيرة إلى أنها صدمت عندما تعرفت عليه عن قرب وعرفت شخصيته الحقيقية بعيدا عن الشائعات المنتشرة.

وقالت زينة خلال لقائها مع الإعلامية «فاطمة مصطفى »في برنامج الراديو بيضحك المذاع على راديو 9090: من أظرف الحاجات اللي حصلتلي في جعفر العمدة اني إتعرفت على محمد رمضان بشكل شخصي، انا كنت عرفاه قبل كدة بس مكنش فيه بينا تواصل.

وأضافت زينة:مبسوطة إني اتعرفت على محمد رمضان، هو شخص محترم وحنين.

زينة مع الاعلامية فاطمة مصطفى

وأردفت زينة قائلة عن محمد رمضان، : هو راجل هايل ومحترم وبتاع شغل أنا اتبسط اني عرفت شخص اسمه محمد رمضان كبني آدم، واستغربت أنه يكون بالأخلاق الكويسة دي، هو حنين وغلبان وكل حاجة في كويسة خلتني اندهش بسبب الكلام اللي بيتقال عليه، ولما اتعاملت معاه عن قرب اتصدمت أنه بني ادم كويس أوي.

زينة تكشف حقيقة خلافها مع خالد يوسف: محصلش

وعن الأنباء المنتشرة بشأن خلافها مع خالد يوسف، نفت زينة ذلك، قائلة: مستحيل يكون بيني وبين خالد يوسف خلاف دي تاني مرة اشتغل معاه في عمل سينمائي ولو فيه أي نوع من الخلاف مكناش هنشتغل مع بعض هيتعب نفسه ليه ويجبني تاني ما مصر مليانة ممثلات وأنا مستحيل حد يجبرني على حاجة وانا مشكلتي في حياتي انك متعرفيش تمسكيني فلو مش حابة مش هعمل ومش هشتغل معاه تاني.

وأنهت زينة حديثها: بحب الأفلام اللي بتجيب فلوس الكوميدي واللذيذة دي حطوني في الحتة دي هتلاقوني بجري لكن في نفس الوقت أدواري مختلفة محدش يعرف يصنفني.

زينة وأعمالها الفنية

ويعرض للفنانة زينة في الفترة الحالية فيلم الإسكندراني الذي تخوض بطولته إلى جانب الفنان أحمد العوضي وكل من بيومي فؤاد وعصام السقا ونخبة من نجوم الفن، محققا نجاحات كبيرة، وهو العمل الذي يمثل عودة قوية للمخرج خالد يوسف في عالم السينما بعد غياب دام طويلا.