دعاء فاروق تهاجم تنبؤات طلاق العوضي وياسمين: أعمال كُـفر

هاجمت الإعلامية دعاء فاروق، تنبؤات عالمة الفلك ليلى عبداللطيف، بطلاق الفنان أحمد العوضي، والفنانة ياسمين عبد العزيز، وهو الأمر الذي تصدر مواقع التواصل الاجتماعي، منذ إعلان الثنائي طلاقهما أمس.

ونشرت الإعلامية دعاء فاروق فيديو عبر حسابها الرسمي بموقع تبادل الصور والفيديوهات “إنستجرام”، قالت فيه : الست اللي طلعت في البرامج عشان التوقعات، والبرامج اللي بتظهر فيها المفروض إنها محترمة، على قنوات وفريق إعداد محترم، الناس دي متعلمة دارسة إعلام، أساتذة كبار في عالم الإعلام والتقديم التلفزيوني، وبيجبوا عندهم ناس بيقولوا عليهم علماء فلك، وبيتوقعوا حاجات عن الناس، وبعدين نقول التوقع طلع صح.

دعاء فاروق تهاجم تنبؤات طلاق العوضي وياسمين

وتابعت: أنتم متعرفوش أن دي أعمال كفر بين، وفي شيء اسمه تسخير جن، لما نجي نقول ده بيسخر جن وبيعملوا أعمال كفر، وبيدخلوا بالقرآن في أماكن سيئة، عشان يطلعوا الجن ويقول كلام من المتشقلب.

واستكملت: أنا  لا يمكن أفتح  التلفزيون في الوقت اللي بتجي فيه الفقرات دي، بناخد ذنب كبير أنا بعين واحدة بتعمل أعمال كفر، إنها تنتشر وتبقى مهمة وتبقى أحسن من العلماء والدكاترة.

وأضافت: البرامج بتجيب عالمة فلك، وهي مش عالمة فلك بتتواصل مع ناس بيعملوا أعمال كفر، ده شيء معروف أنتوا عايزين  تنساقوا وراء الكفر اللي فيه حرمانية واضحة، أنتوا مش خايفين يا سادة يا قائمين على هذه البرامج من العذاب العسير، لأنكم بتشكلوا وجدان الأمة والناس، ومحدش ضامن عمره، أنا ممكن أموت حالًا، ده التاريخ اللي هسيبه أن أجيب واحد بيعمل أعمال كفر ويسخر جن عشان يجبله أخبار عبيطة دي أخبار عبيطة مش غيب.

طلاق ياسمين عبد العزيز وأحمد العوضي

واسترسلت:  ده دجل وشعوذة، وأعمال سفلية، وأعمال جن، عيب أحنا ناس متعلمين ودارسين في أحسن الأماكن، لما تجي تشكل وجدان الأمة بشيء منحط، ويصعب عليا أن في مذيعين بحبهم وشاطرين جدًا  ينساقوا في السكة المتخلفة دي، وكده بفتح باب كبير أن الناس تمشي تؤمن  بأشكال تعمل أعمال كفر.

أضافت: لو هي قالت التوقع وطلع صح، ده يخلينا نتأكد  أن الناس دي بتحضر حاجات عن طريق حرام، وبيحضروا جن عشان يقولهم معلومة، الجهل بقى على أكبر قنوات وأهم شاشات ويجني كل هذه المشاهدة، ويعمل كل هذه الدوشة، وهي بتكون يا  محضرة جن، يا تعرف حد يحضره  ليها.

واختتمت: يعني إيه القنوات لا تحترم فكرة التوقعات، ويطلعوها يصقفوا ليها، ويبتدأ الناس ترحلها ويدفعوا ألفات عشان تظهر معاهم، اتقوا الله أنا بسمع قرف من الصبح، عاملينها بطلة عشان حضرت جن بطريقة حرام، اتقوا الله لو أخر كلمة وأموت بعدها اتقوا الله.