عزت العلايلى الذى قضى عمره فى محراب الفن..

رحل الفنان الكبير عزت العلايلى عن عالمنا صباح اليوم، عن عمر ناهز 86، تاركا لنا مجموعة كبيرة من الاعمال الفنية التى لن تمحى من ذاكرة الجمهور العربى.

وعن أصعب المشاهد التى قدمها الفنان عزت العلايلى فى تاريخه الفنى، قال العلايلى من خلال أحد البرامج التليفزيونية، الذى حل ضيفا عليها فى الفترة الماضية، أن من المشاهد التى خشى من تنفيذها هو مشهد نزول الجاموسه فى الترعة فى فيلم “الارض” للمخرج الراحل يوسف شاهين قائلا:

"كنا بنصور فى شهر طوبة وشاهين مواعيده مش بتهزر والدنيا تلج، فاديت لفلاح فلوس وقولتله انزل كدة الترعة شوفلى عمق الميه راح ورجع قالى خد فلوسك يا بيه الميه تلج هو انت هتنزل هنا.. قولته أه .. قالى إزى الميه مليانة ديدان.. مبقتش عارف أعمل إيه ولقيت يوسف شاهين ماسك زجاجة قد صباعه وينقط فى الميه قولتله إيه ده يا جو قالى مطهر، ضحكت وقولتله ده اللى هيطهر يعنى، قالى يلا نط عشان نصور والمشهد ده خد تصوير نصف يوم".

وعن علاقته بالمخرج الكبير يوسف شاهين قال: "فى واحد جه قالى يوسف شاهين عاوزك، وأنا فكرتى عن شاهين إنه تنك، وفى يوم كان عندى ناس سهرانة ومشيوا متأخر والشقة كانت مبهدلة والصبح بدرى لقيت الباب بيرن فتحت لقيت يوسف شاهين، دخل قالى إيه الدوشة دى فرديت عليه قولتله معلش كان عندى ناس سهرانة، فقالى عموما أنت هتمثل معايا فى فيلم الأرض يلا حضر نفسك للتصوير.. واتفقت فعلًا على الفيلم من غير حتى ما اقرأ السيناريو.. وكانت أيام تصوير فيلم الأرض من أجمل لحظات وأمتع أيام عشتها فى حياتي"، وأضاف عزت: "كنا بنصور فى الفيوم الصبح تصوير، وبليل أمسيات شعرية وسياسية وفنية مع فريق الفيلم والوفد الصحفى اللى كان معانا وقت التصوير كانت شغلنا وقتها قضية النكسة والأرض".