السيناريست محمد أمين راضي يهاجم محمد سلام: موقفك غير مهني.. بطلوا ابتذال

أعرب السيناريست محمد أمين راضي، عن استيائه من موقف الفنان محمد سلام لما يتعلق بعدم سفره للاشتراك في مسرحية"زواج اصطناعي"، الذي يعرض في الأيام القليلة القادمة في موسم الرياض بالمملكة العربية السعودية، مشيراً إلى بأنه يعتبر هذا الموقف هو مزايدة على كل الفنانين. 

 السيناريست محمد أمين راضي عن موقف محمد سلام : موقفه غير مهني و يريد المزايدة على الجميع 

وأوضح راضي، عن رأيه فيما يتعلق باعتذاره محمد سلام عن مسرحية «زواج اصطناعي»: «غير مهني مشيرًا إلى أنه حتى لو مشاعرة صادقة كان من الممكن أن يعتذر عن المسرحية قبلها بأسبوع وليس قبلها بيوم».

وكتب “راضي”، عبر حسابه الرسمي على موقع التواصل الاجتماعي «فيس بوك»: «مش قادر فكرة إني علشان بحب محمد سلام جدا فأقرر ما قولش رايي بصراحة مضايقني من أول ما قولت لنفسي كده امبارح، لأن على الجانب الآخر ما صلاح الجهيني صاحبي، بس حقيقي بعيد بقى عن المحبة والصداقة، اللي عمله سلام فعل غير مهني بالمرة، حتى ولو مشاعره صادقة، كان عادي يعتذر من أسبوع، مش قبلها بيوم، وكان عادي خلاص برضه ده يحصل بصمت، بدون أي فيديوهات تحرج زمايله اللي موجودين حاليا، وبتحرج اكتر اللي هيجي بعده، خصوصا أن صار العرف أن الواحد بيعمل الفيديوهات اللي بيوضح فيها موقفه للناس اللي هو عامل حاجة غلط في حقهم أو اللي زعلانين منه، اللي همه في الحالة دي».

وأضاف:«الجمهور اللي قطع التذاكر بناء على الإعلانات اللي هو موجود فيها لحد امبارح، وطبعا الفيديو المعمول مش موجه خالص للجمهور اللي بتكلم عليه. والأهم بقى من كل ده وفوق كل ده الفن مش رفاهية الفن مش رفاهية أو شيء ممارسته تسيء وتقلل من هيبة الحزن، ومش هتكلم خالص عن خصوصية الفن ودوره. خالص انا مش هتكلم إلا على كونه مهنة ما فيش أي مهنة بيتطلب منها أو بيتطوع صحابها من نفسهم بالتوقف عشان الظروف إلا إحنا ما قبلتش أنا حد في بنك قرر يستقيل عشان خاله مات مثلا وحقيقي أنا مش فاهم إيه اللي حصل أنا واحد اتربى على جيل من الفانين كانوا بيتفاخروا بأن أقرب الأقربين ليهم ابوهم مات وهمه دفنوه وطلعوا على المسرح علشان عندهم ميعاد خشبة مسرح وعندهم جمهور قاطع تذاكر واحترامه شيء مقدس سيد مكاوي واخرين كان بيسافر الجبهة بتاعت الحرب عندنا إحنا علشان يعملولهم حفلات مخصوص لرفع من روحهم المعنوية فإللي إحنا بنتكلم فيه لا هو بدعة ولا أفورة مننا في حقيقة الأمر انتوا مبتذلين».

محمد سلام يعتذر عن مسرحية في موسم الرياض

ونشر الفنان محمد سلام  فيديو عبر حسابه على موقع تبادل الصور والفيديوهات “انستجرام”، وقال :  إن شاء الله هسافر بكره الرياض عشان أعرض مسرحية زواج اصطناعي، والمفروض إنها مسرحية كوميدية وفيها أغاني واستعراضات والمفروض إننا هنعرض إن شاء الله يوم 30 وهنعرض في وسط الأحداث اللي بتحصل في غزة، مش متخيل إني هروح اعمل مسرحية واهزر واغني وارقص واخواتنا في فلسطين عمالين بيتقتلوا ويدبحوا ومفيش حاجة بتحصل، أنا مش هقدر اسافر طبعًا.

محمد سلام و موسم الرياض

واختتم : وحابب قبل ما اقفل اقول اللهم طهر قلبي من النفاق وأعمالي من الرياء، الفيديو  ده معمول؛ لأني فعلًا في مشكلة؛ لأني بقالي كتير جدًا مش عارف اسافر ولا اعمل إيه وامبارح كنت قاعد مع فنانين وقالولي سافر ده أكل عيشك وهو فعلًا التمثيل ده رزقي ورزق أولادي واللي بصرف عليه، دلوقتي أنا لو مسافرتش هل هموت من الجوع؟ أكيد لا، بس الناس هي اللي هتموت في غزة، ولو حد هاجمني هيقول بس التمثيل ده رسالة، أنا عارف طبعًا، خصوصا الكوميديا إني اضحك حد واضفي روح البهجة، والمفروض فكرة إن دخول البهجة على قلب حد له أجر، بس السؤال مين اللي احنا محتاجين ندخل البهجة على قلبه دلوقتي مين؟.. شكرًا.