أخبار

قال الدكتور أسامة قابيل، من علماء الأزهر الشريف، إنه يجب أن يكون الحمد لله على الحمد لله، مضيفا: " لازم أحمد ربنا لانه وفقني بلساني وقلبي وجوارحي، لو فكرنا كلنا واحنا بنصحى كل يوم الصبح بحرك رجلي بنزل من السرير الاقيها بتتحرك، بامد ايدي على الموبايل اجيبه عشان اشوف ايه الاخبار الجديدة، ابدأ يومي بنبدأه في الموبايل كلنا للاسف النهارده، نعمة كبيرة. الانسان اللي ربنا سبحانه وكرمه بيوم جديد وشمس جديدة وفجر جديد طبعا فرصة جديدة، إنه يقول من قلبه الحمد لله".

وتابع قابيل، خلال حواره مع الإعلامية إيمان رياض، فى حلقة برنامج "من القلب للقلب"، المذاع على فضائية "mbcmasr2"، اليوم الاثنين: "ربنا يقول (وإن تعدو نعمت الله لا تحصونها)، وفكرة نعمة الله في الآية دي جاية بالتاء المفتوحة، عشان عندنا كلمة نعمة بالتاء المربوطة، النعمة العادية، أما بالتاء المفتوحة كان ربنا عايز يقول لك انا فتحت عليك باب كبير".

واستكمل: طيب احنا في حياتنا كبشر وبني آدمين ضعاف ربنا قال كده (وخلق الإنسان ضعيفا ضعيفا)،

طيب ازاي أنا كبني آدم أو إنسان استشعر نعم ربنا علي، حد هيقول لي نعم ايه؟ ده احنا نمر بضغوط ومشاكل وما حدش فينا ما عندوش في الصندوق بتاع حياته مضايقاه وعامله له هموم وضاغطة عليه، وعلى كل تفصيلة في حياته، طيب خلينا ناخدها بالراحة كده في حاجة اسمها المفقود وفي حاجة اسمها الموجود، دايما احنا نركز على المفقود انا ما عنديش ايه؟ ايه اللي ناقصني؟ فلان ده اشمعنا عنده؟ فلان ده اشمعنا اشترى؟ اشمعنى لبس؟ اشمعنى اشمعنى اشمعنى؟ طب لو انت قعدت كل يوم الصبح كده تبص تشوف ربنا اعطاك نعم قد ايه؟ يعني نستبدل اشمعنى بالحمد لله بالنعمة اللي عندي

الحمد لله عمرها ما كانت باللسان لان احنا كلنا بنردد وبنقول الحمد لله بطريقة كده ايه اخبارك ايه الحمد لله اهي ماشية تحس انك بتشتكي اصلا متزمر والعياذ بالله، او كأنك دايما تشتكي، لازم تبص على نعم ربنا الكتير ولا تنظر لغيرك".