علقت الفنانة سحر رامي، على قلة أعمالها الفنية خلال السنوات الماضية، قائلة: «الجمهور مش عارف إيه اللي في المطبخ، لما يحد بيقابلني بيقولي إنتي فين؟ مش بتشتغلي ليه؟ إنتي خلاص مش عايزة تشتغلي؟ بيكون معنديش رد،وكأن الواحد هو اللي بيشغل نفسه، الموضوع مش كده، الموضوع ميديا وحاجات تانية».
وعن شائعة ارتداءها الحجاب واعتزالها، قالت «رامي» خلال حوارها في برنامج «كلام الناس»، الذي تقدمه الإعلامية ياسمين عز، عبر قناة «إم بي سي مصر»، اليوم السبت: «الإشاعة دي موصلتنيش، لأني بعيدة خالص عن شائعة الحجاب، معنديش مقدمات أو حاجات تقول إني ممكن أعمل كده، يمكن اتقالت بس أنا مسمعتش».
وأضافت: «أنا بعيدة خالص عن الموضوع ده، أنا بعيدة عن إشاعة زي دي، لأني معنديش مرة قلت مش هتباس أو إني مش بلبس قصير أو مبعملش أدوار إغراء، دي كلها بتكون تمهيد إن الشخص عنده ميول متحفظة».
وتابعت «رامي»: «أنا طبيعية وعادية، لو في أدوار مش هتناسبني معملهاش، بس مش بحط في الموضوع أسباب دينية أو أسباب أخلاقية، أنا معنديش مانع أي حد يعمل أي حاجة، هو حر في اختياره».