الفن

في لفته إنسانية مؤثرة، استجاب مطرب المهرجانات الشعبية عمر كمال  لطلب طفله بإحياء حفله الغنائي في السويس بعد أزمته الأخيرة. 

وأعاد عمر كمال نشر فيديو هذه الطفلة عبر صفحته الرسمية بموقع التواصل الاجتماعي “انستجرام”، ووجه لها رسالة قائلا: لما قولت إني هدخل حفلتي في السويس وصلي فيديو من البنوتة القمر دي، هي من السويس ، وعندها ظروف خاصة، والناس اللي زي دي متكدبش قلبهم زي البافتة البيضة دول على الجنة على طول. 

وأضاف: إن ربنا يحط حبي في قلبي، دي حاجة تفرحني جدا، وتبقى عارفة الأغاني بتاعتي بالشكل ده، دي حاجة تخليني في قمة السعادة والتأثر، هي كان نفسها تخرج في اليوم ده وتحضر الحفلة وتشوفني، وبما إن الحفلة اتلغت، وهجيلك لحد عندك في البيت، واغني لك  كل الأغاني اللي إنتي عايزاها. 

اعتذار عمر كمال لأهالي السويس بعد إلغاء حفله

وقد عمر كمال منذ أيام رسالة اعتذار إلى أهالي محافظة السويس، عقب إلغاء حفله المجاني الذي كان من المقرر إقامته لأبناء المحافظة، معربًا عن أسفه لعدم تمكنه من لقاء جمهوره في الموعد المحدد، ومؤكدًا تقديره ومحبتَه لأهالي السويس الذين كانوا ينتظرون الحفل.

وقال عمر كمال في فيديو نشره عبر صفحته الرسمية بموقع التواصل الاجتماعي “فيسبوك”: حبيب أوضح حاجة مهمة علشان ميتقالش عليا بتاع شعارات ولا لقطات في الهوا، أنا من شهرين كتبت بوست عندي إن عيد السويس القومي قرب، ونفسي اعمل حفله، وافرح أهالي السويس.

وأضاف: طلبت من المحافظة طللبين هما إن ميكنش فيه رسوم للحفل علشان نفرح المواطن السويسي البسيط، والطلب التاني إنكم تدوني مكان كويس متأمن للحفل، يا ريت حد يوصل صوتي للسيد المحافظ، الناس مشكورين وصلوا صوتي من كام يوم، وقعدت مع المحافظ وقولت له تحت أمرك إنت وأهل السويس، وأنا وفرقتي حاضرين، وحددنا الحفل يوم الخميس الجاي 22 أكتوبر، وكتبت بوست إني هجيب فنان كبير معايا في الحفل، وطرحت على المحافظ الإسم، وهو فنان أكبر مني سناً ومقاماً.

وتابع: المحافظ وافق وقالي يا ريت ييجي هتبقى لقطة كويسة لشعب السويس، وقمت بالتنسيق مع هذا المطرب، وقولت هنراعي إن الحفل هيكون فيها سيادتك، وقيادات كتير، وهنتقي الأغاني اللي هغنيها، علشان فيه أغاني مينفعش أغنيها، وهغني أغنيتي للسويس اللي عملتها  من 17 سنة، وأغنية جديدة لسه عاملها للسويس، وفيها أغاني تليق بهذا الحدث الجلل.

واستكمل، نسقت مع الفنان الكبير ده اللي كلكوا بتحبوه، و بقالوا كتير مظهرش، واتفقت معاه ييجي ويعمل حفلة كويسة، ومن كام يوم مسئول في المحافظة كلمني، وقالي إن فيه ناس في المحافظة راحوا مخصوص للمحافظ، وقالوا له عمر كمال لأ، مين وليه يعملوا كدة، أنا مش بتاع لقطة ، ولا مستنفع من الحفل ده لأنه بالمجان ..كل اللي كنت عايزه إن شعب السويس البسيط يقول عمر كمال طمر فيه العشرة.

واختتم: أنا بعتذر لكل أهالي السويس أنا التزمت بكلامي معاك ، ومديت إيدي بالخير، وكنت عايز افرحك، بس فيه ناس مش عايزة ده، وكل الشكر للمحافظ اللي وافق على طلبي، وكان عايز يفرح أهل السويس.