كشف المايسترو هاني فرحات عن كواليس مشاركة النجمة شيرين عبدالوهاب في حفل «ليلة الدموع» الذي أُقيم في العاصمة السعودية الرياض، مؤكدًا أن ظهورها كان مفاجأة للجميع، ولم يكن أي من الحضور يعلم بوجودها ضمن فعاليات الحفل.
وقال هاني فرحات خلال مداخلة هاتفية عبر برنامج “الصورة” المُذاع عبر قناة النهار مع الإعلامية لميس الحديدي:
ما كانش حد يعرف إن شيرين موجودة، ولا اتحطت في إعلانات ولا في بوستر ولا أي حاجة، هي طلعت كضيفة الحفلة ومفاجأة الحفلة.
كما تحدث هاني فرحات عن موهبة النجمتان شيرين عبدالوهاب وأنغام، مشيرا أنهما يكملان بعضهما، حيث قال: أنغام هي صوت مصر، وشيرين عبدالوهاب إحساس مصر.
وتحدث هاني فرحات عن تعليق شافه مؤخرًا على مواقع التواصل الاجتماعي بخصوص الفيديو، واللي صاحبه قال فيه إن «الجن كان بيساعد فيها شيرين، وكان بيساعد فيها هاني فرحات، وكان بيساعد فيها الموسيقيين»، مؤكدًا إن الفكرة الأساسية إن «العوامل كلها اكتملت».
وأوضح فرحات إن تفاعله أثناء الحفل بيحصل بشكل تلقائي وطبيعي، وممكن في الأساس ما يكونش عارف إن الكاميرا بتصوره، قائلًا: «أنا الحالة دي ممكن أولًا أنا ما أعرفش إن الكاميرا بتصورني»، لافتًا إلى إن طبيعة شغله بتخليه دايمًا واقف بظهره للجمهور، وإن تعبيرات وشه وردود أفعاله مش موجهة للكاميرا أو معمول حساب إنها تتصور.
وقال: «شغلتي دايمًا ضهري للناس، الإكسبريشنز وردود أفعال وشي وأنا دي مش مفترض إنها تتصور، أو أنا ما بعرفش إمتى هتتصور»، موضحًا إنه بيقدم حفلة مدتها 3 ساعات ونصف، ومش ممكن يعرف إمتى الكاميرا هتتوجه ناحيته، مضيفًا: «أنا بطلع أعمل حفلة تلات ساعات ونص، الثانية اللي الكاميرا هتيجي فيها عليا يعني أنا مش هبقى عارف دي أنهي ثانية أو فين».
وأكد هاني فرحات إن الجمهور حب الفيديو اللي ظهر فيه وهو بيبكي لأنه كان حقيقي وعفوي، موضحًا إن نفس الحالة ممكن تحصل معاه حتى أثناء البروفات، لو كل العوامل اكتملت ودخل في نفس الحالة الموسيقية.
وقال: «أنا ممكن الموقف ده يحصل لي في البروفة لو كل العوامل اكتملت، لو هي دخلت البابل والموسيقيين دخلوا البابل وأنا كده هيحصل لي نفس الحكاية وهتأثر بنفس التأثير»، مؤكدًا إن دخول شيرين والموسيقيين في «البابل» نفسها اللي بيعيشها أثناء الأداء، ممكن يخليه يتأثر بنفس الشكل.