كشفت الإعلامية أسما شريف منير عن عدد من الدروس والتجارب التي مرت بها في حياتها وتعلمتها بصعوبة، وحرصت على مشاركة جمهورها هذه التجارب وتقديم بعض النصائح لهم حول كيفية تجاوز الأزمات والتحديات، وذلك من خلال منشور عبر حسابها الرسمي على موقع «إنستجرام».
وكتبت أسماء شريف منير عبر حسابها الرسمي بموقع التواصل الاجتماعي “انستجرام”: حاجات اتعلمتها بالطريقة الصعبة أوي أوي كمان متستناش لما تبقى جاهز، إحساس إنك جاهز ممكن ميجيش أصلاً. ابدأ وخلاص، الالتزام أهم من الحماس، لأن الحماس بيروح وييجي، إنما الالتزام هو اللي بيخليك تكمل.
وأضافت: اختار نفسك كل مرة. إنك تختار نفسك مش أنانية، ساعات بيكون ضرورة، مينفعش تفضل تدي للناس وإنت مفيش فيك حاجة تديها، اتكلم ومتفضلش طول الوقت بتحاول ترضي الناس. مش لازم كل الناس تحبك.
خليك واقف ورا حاجة مؤمن بيها، وسيب وراك حاجة ليها معنى، الغلط جزء من الرحلة. غلطاتك مش هي اللي بتحدد إنت مين، المهم تتعلم، تعدّل وتكمّل.
وتابعت: مش كل حاجة معمولة عشان تفضل الناس بتتغير، الأماكن بتتغير، والمراحل بتخلصـ ساعات لازم حاجة تمشي عشان تعمل مكان لحاجة أحسن، حافظ على سلامك النفسي. مش كل حاجة تستاهل طاقتك، اتعلم تقول لأ، تحط حدود، ومتتراجعش عنها كل ما حد يزعل، الاستمرارية هي اللي بتكسب. خطوات صغيرة كل يوم ممكن تعمل فرق أكبر من دفعة حماس كبيرة كل فترة
واستكملت: خليك طيب، بس مش لازم تبقى متاح لكل حاجة ولكل حد، ممكن تبقى شخص كويس وفي نفس الوقت تحافظ على وقتك وطاقتك، مش كل معركة لازم تبقى معركتك. ساعات وإنت بتتغير وبتكبر هتحس إنك لوحدك، لأن مش كل الناس هتفهم إنت بتعمل إيه أو ليه. وده عادي، كمّل برضه.
واختتم: وإنت بتسعى لبكرة أحسن، متنساش تعيش النهارده. الحياة مش مستنياك توصل، هي بتحصل دلوقتي
كل مرحلة بتطلع منك نسخة أهدى، أقوى وأوعى، ولسه بنتعلم، ولسه بنتغير، ولسه بنكبر.