كشف الويتر المرفود، صاحب واقعة حفل تامر عاشور تفاصيل الواقعة التي أدت إلى إصدار إدارة الفندق قرارها برفضه نهائيا من عمله.
وقال الويتر المرفود خلال لقائه مع «بصراحة»: أنا اسمي طه ناير أنا اللي كنت واقف بغني في حفل تامر عاشور، اللي حصل إن وأنا في شغل وبحب شغلي جدا، حصل لحظة عفوية أنا مقصدهاش، أنا اليوم ده تعبت فيه حقيقي جدا لإن ماسك سيشن كبير جدا في الـ VIP، ،وفجأة جدا تامر عاشور غنا أغنية كدخ، فايدوبك تفاعلت معاه لثواني، وفيه حد صورني فيديو وشيره، وكذا موقع شيره، تاني يوم لقيت الفندق بيتصل بيا وبيقولي إنت اتعمل لك بلاك ليست، ومش هينفع تدخل الفندق تاني.
وأضاف: قالوا لي ملكش شغل تاني، والدنيا مقلوبة، وأنا قولت عملت ايه لكل ده، ايه الجريمة و الكارثة اللي أنا علمتها أنا إنسان عندي مشاعر وأحاسيس، أنا مجرد تفاعلت لثواني على الأغنية، والموضوع مش مستاهل يقطعوا عيشي، وربنا يعوضني، وفيه ناس كتير جدا دعمتني.
وتابع: ولما الفيديو اتنشر لقيتهم بعتنلي فصل وبيقولولي خلاص علشان إنت أساءت الأدب في الشغل وع إن اليوم ده قبل اللي حصل الناس كلها كانت مبسوطة مني، وبتشكر في شغلي،وفيه حد كلمني من عند الفنان ده، وقالت لي احكي لنا إيه اللي حصل، وبعت لها فويس بتفاصيل الواقعة، ولسة مردوش، وأنا مش عايز حاجة، أنا بس بسأل ليه تقطع عيش واحد صاحب بيت وعيال، عملت إيه علشان تقطع رزقي وتقعدني في البيت، وإن شاء الله ربنا يعوضني بشغل أحسن علشان أنا معملتش حاجة.
كما وجه رسالة لـ تامر عاشور قائلا: بحبك جدا يا أستاذ تامر وفداك شغلي وفداك كل حاجة، وأنا كنت متفاعل ومبسوط في الحفلة جدا جدا.
واقعة الويتر مع تامر عاشور
قررت إدارة أحد الفنادق بالأمس فصل ويتر تفاعل لثواني مع أغاني تامر عاشور في حفلته التي أٌقيمت منذ أيام في أحد الفنادق الكبرى بالقاهرة.
وذكر الكاتب الصحفي خالد فرج تفاصيل الواقعة من خلال منشور عبر صفحته الرسمية بموقع التواصل الاجتماعي “فيسبوك”، والذي جاء كالتالي: تخيلوا شاب يترفد من شغله لمجرد إنه تفاعل لثوانٍ مع أغنية للمطرب المفضل ليه، اللي بقوله ده مش مشهد في فيلم عبثي، دي واقعة حقيقية رواها لي صاحبها بنفسه.