الرياضة

شن أحمد مجدي لاعب الزمالك الشاب، هجومًا حادًا على مجلس إدارة القلعة البيضاء، بعد إخطاره بقرار الاستغناء عنه قبل أيام من غلق باب الانتقالات الصيفية.

أحمد مجدي يهاجم إدارة الزمالك بعد قرار رحيله

كتب مجدي عبر حسابه الشخصي على فيسبوك: «بقالي 14 سنة داخل نادي الزمالك، دخلت النادي وأنا صغير بعد ما روحت الاختبارات، وعملت أكتر من 10 اختبارات. في كل مرة كنت بروح وأنا عارف إن ممكن أمشي، لكن كنت واثق في ربنا، والحمد لله اتقبلت من غير أي واسطة. وطول عمري في الكورة، لا كان ليا واسطة ولا اعتمدت على أي حد، غير توفيق ربنا ثم مجهودي».

وتابع: خلال الـ14 سنة لعبت في كل المراحل السنية، وتشرفت بتمثيل منتخب الشباب، واتصعدت للفريق الأول مع الكابتن جوزيه جوميز، لكن للأسف، قبل القيد بأيام قليلة، اتبلغت إني مش هكمل مع النادي».

أضاف: «الموسم اللي فات، فجأة اتقال لي إن عندي مشكلة صحية ومحتاج أعمل أشعات، رغم إني عمري ما اشتكيت من أي حاجة، ولا حسيت بأي أعراض. فضلت حوالي 6 شهور بعمل فحوصات وأشعات بسبب حاجة في الآخر طلعت مش موجودة أصلًا، وضاع عليا موسم كامل كنت مستنيه عشان أثبت نفسي مع الفريق الأول».

وواصل: وفي النهاية، جبت تقرير من رئيس قسم القلب بجامعة القاهرة، وهو نفس الدكتور اللي النادي طلب مني أكشف عنده، وأكد إن حالتي سليمة تمامًا، ومفيش أي مانع من ممارسة كرة القدم.

وأكمل: رغم كده، النادي رفض أكتر من عرض جالي من وقت تصعيدي للفريق الأول، وكان دايمًا الرد إن “إنت ابن النادي ومستقبل النادي”.

واختتم اللاعب الشاب قائلًا: طول فترة الإجازة كنت بتواصل مع النادي عشان أعرف موقفي، ولو مفيش نصيب كنت أشوف مستقبلي في مكان تاني قبل ما الأندية تقفل قوايمها، لكن في كل مرة كان الرد إني مستمر مع الفريق.