خلال الساعات الماضية تداول السوشيال ميديا فيديو لـ والد عروسة قرر عدم كتابة قائمة منقولات على العريس، وكانت أول مبادرة بتيسير الزواج داخل قرية كم عمران.
رغم أزمة الزواج في الصعيد، قرر والد العروسة أن تكون البداية من عنده، وكتب في قائمة المنقولات وهي جملة واحدة : من يؤتمن على العرض لا يٌسأل على مال.
وعندما وصلنا لـ قنا ذهبنا لـ والد العروسة وقال في لايف خاص لـ موقع بصراحة: الموضوع ده مجاليش من النهارده ولا بعده من كتير بقول الكلام ده وفي كتير بيقولي لا، متبدي بنفسك الأول، والحمد لله بناتي كبروا .. أنا راجل عندي خمس بنات لما كل بنت اكتبلها قايمه بـ600 ألف جنيه ده غير الهدوم والعفش والمهر، ليه أكلف العريس، لا يا عم تعالى نمشي واحدة واحدة، وأنا أول واحد اعمل كده، ولما العريس يلاقي واحد عمل كده هيتشجع إنه يدخل بيوت، أنا مديله حاجة أغلى من المال، هستفاد إيه من الفلوس لو رمى بنتي في الشارع، هديله حتة مني بفلوس إزاي، وهعمل ده مع باقي بناتي، أنا بقعد مع العريس وقت الاتفاق واعرفه مفيش خروج وكلام في التليفونات و بعرفه وضعي.
وعند سؤال العريس عن إحساسه قال: احساس ميتوصفش بصراحة، وهو كلام ربنا ده أكبر من اني اكتب قايمه والكلام ده ف انا ربنا يقدرني إن شاء الله و اوفي الدين اللي عليا.
واختتم الأب حديثه فـ قال: الكل يتقي الله في بنته، الكل بيفكر هيدي إيه لبنته .. فكر أنت هتديها لمين، وهل العفش ده هيفيدها في حاجة؟ كنت هجبلها اللي هجيبه".