كشفت زوجة شقيق بسمة علي، التي لقيت مصرعها على يد طليقها بطعنات في المنوفية، تفاصيل خاصة عن يوم الحادث، في لايف خاص لموقع بصراحة.
وقالت: كنت ماشية أنا وهي نجيب عجلة لطفلها آدم وحجزوا العجلة وهما راجعين دخلت مرات اخوها تجيب تلفونها
وأولما رجعت قالتلها ان جوزها كان بيحاول يتكلم معاها.
وتابعت: لكن هي رفضت ومرات اخوها قالتلها تعالي جوه لا يعمل فيكي حاجة وخدوا بعضهم ومشيوا لقيوه طالعلهم من شارع تاني وفضل يقولها اقفي لكن هي رفضت.
وواصلت: مرات أخوها فضلت تصوت وتستنجد بالناس وتقولهم إنه دا طليقها وممكن يغدر بيها والشباب جريوا وراه وهو بسرعة جري وهي فضلت تقول لمرات أخوها متخفيش مش هيقدر يعمل حاجة.
واستكملت: وهو كان مستخبي في شارع مقطوع وابنها قالها يا مرات خالو دا بابا طالع من الشارع دا وهي قالتلها يا بسمة اجري ومفيش 60 متر لقيوه طالع".
وقالت :قولتله استهدى بالله وسيبها تمشي ومش طبيعي تطلع من السجن امبارح ترجعلك النهارده.
وتابعت : ملكيش دعوه وطلع أداة حادة ومسكها في إيده ومرات أخوها اتخضت وفضلت تصوت ومسك طليقته بسمة وفضلت تستغيث وتقوله أنت عايز مني إيه وبسرعة .. راح ضربها طعنة في صدرها وبعدها طعنة في بطنها وآ خر طعنة في ضهرها.
واختتمت: أهلها جريوا عليها ولقيوها خلاص فارقت الحياة وبعد ما نقلوها علي المستشفى والدكتور قالو انها خلاص فارقت الحياة".