تحدث الرئيس عبد الفتاح السيسي، عن تطوير الطرق والمحاور في محافظة الجيزة: "لما قولنا فى غرب القاهرة الكبرى أو غرب محافظة الجيزة، أردنا تحرير الحركة بشكل لا يقل عن شرق القاهرة، وبالتالي القاهرة سواء شرقها أو غربها أو غرب النيل وفق التوصيف من نهر النيل.. وأمامنا تحدي إنك مثلا فى منطقة كرادسة.. بتتكلم في عدد سكان كبير أوى.. طب احنا حلينا المسألة على محور رئيسي سواء عرضى أو طولي حول هذه المنطقة".
وأضاف الرئيس السيسي، خلال كلمته في افتتاح مشروعات قومية جديدة: "نعمل محور رئيسي أو محورين.. واحد طولى وعرضي.. ياخد الحي ده ويكون فيه حركة.. عارف ان حكم المساكن اللى موجود في المنطقة دي.. زى كرداسة وناهيا وبولاق.. طرق بسيطة.. حارة وحارة أو حارتين و حارتين.. احنا حلينا الموضوع حول الجيزة.. عاوز اخلى المواطن اللي في بولاق وكرداسة يتحرك بشكل كويس".
وأكد الرئيس، أن الدولة وضعت مبدأ عام بتعويض المواطنين حين يتم الإزالات من أجل الصالح العام، متابعا: "اللى بنعمله ده من بناء طرق وكباري الهدف أن المواطن يتحرك كويس.. مش معقول الفارق بين البيت والبيت 5 أو 10 أو حتى 20 متر.. الموضوع ده محتاج دراسة مع محافظة الجيزة.. نشوف المحاور الموجودة بالفعل جوه الأحياء وهل يمكن التوسعة ولا".
وأضاف السيسي، :علشان نعمل نضطر إلى بعض الإزالات.. وبقول الكلام ده مبدأ عام الدولة حاطته على نفسها.. اى إزالات للنفع العام.. الدولة تعوض الناس.. الخطة الطموحة هتخلص السنة دى كله.. هل ممكن نكون نبقى طموحين ونخلصه السنة دى.. احنا في شهر 3".
وقال السيسي، إن وزارة النقل قامت بعمل مشروعات بقيمة 1.6 تريليون جنيه، فضلا عن الطرق التي تقوم بإنشائها وزارة الإسكان والقوات المسلحة.
وأضاف الرئيس: "الصورة اللى بنقدمها للناس مش الهدف منها تسجيل جهدنا، إحنا بنحاول نحل مسائل ونخفف على الناس حركتها اليومية والاقتصاد، وأتصور إن ده ليه تأثير كبير جدا على نسب التلوث، لأن إحنا محتاجين وإحنا في المؤتمر "كوب 27" نعرض خطتنا الاستراتيجية لتخفيف حجم التلوث في مصر من خلال المشروعات المختلفة سواء الكهرباء والسكة الحديد لتقليل نسب التلوث".
وقال السيسي، إن حرصنا على الأرض الزراعية نابع من أنها أرض شديدة الخصوبة قياسا بالأراضى المستصلحة، وتروى بـ"راحة"، لافتا إلى قدرة الدولة على تلبية جميع مطالب الإسكان قائلا: " احنا قادرين كدولة تلبي مطالبكم.. انتوا كمان متضيعوش فلوسكوا في حاجات!!".. شغالين في برنامج فيه 500 ألف وحدة غير الإسكان كله.. عواصم المحافظات 500 ألف وحدة بيتعملوا بالنمط اللى هتشوفوه دلوقتي .. بنعمل كده علشان مش عاوز أشوه الطفل اللى طالع وفكره وذوقه أنه يطلع في بيت مش زى ما احنا بنعمل".
وتساءل الرئيس : ليه الناس بتبني كده؟! .. فى مدينة الامل ببص على البيوت ألاقى البيوت كتير وعالية وثلاثة ارباعها فاضى.. اللى عمل كده يضيع فلوسه ليه؟!.. بقالنا 7 سنين بنوفر إسكان اجتماعى، حتى لو تطلبت مليون وحدة هنعملها.. موضوع الإسكان فكرة ترسخت في نفوسنا أن مفيش حل لها .. لا دى اتحلت خلاص.. مش هنخلى طلب على الشقق فى اى محافظة الا لما نلبيه .. وفروا فلوسكم.. متعملش عمارة 7 أدوار.. شايف واحد عامل عمارة 6 أدوار وعامل سلم 12 دور".
وتحدث الرئيس عن التخطيط الخاص بالعاصمة الإدارية الجديدة، قائلا: "العاصمة الجديدة مش محتاجة مترو الأنفاق.. ودى الرسالة اللى بنقولها للناس.. لما الدولة تعمل حاجة بتاخد بأساليب العلم والتخطيط السلمية في أي منشأة.. والتنفيذ يتلاءم مع متطلبات الحياة.. لو فيه مدرسة تتعمل مدرسة.. لو فيه مستشفى بتتعمل مستشفي.. لو مناطق صناعية أو حرفية.. بنعملها".
وأكد الرئيس عبد الفتاح السيسي، أن هناك ثقافة يجب تغييرها فى التعامل مع البناء، متابعا: "المواطن من غير ما يقصد.. يلاقى حتة أرض جنب بيته يبنى خلاص".
وأضاف الرئيس السيسي: "بقولها لكل المصريين.. وأرجو أنكم سجلوها كويس وتفكروها فيها كويس.. اللى معاه قرشين.. يروح يبنى أي حاجة.. انا بشوف حجم العمارات وحجم الاشغال اللى فيها.. لو معاك قرشين تعالى في العمارة بتاعتك 5-6 أدوار وأنت مش هتسكن فيها.. لو انت معاك فلوس وحطيتها في البنك ده هيوفر لك عائد مناسب.. انت تبني على أرض زراعية.. أو أرض مش بتاعتك.. اللى تبني عليه مش هيجيب حاجة.. دى ثقافة عندنا.. حتى الريف.. يبنى دور ولا دورين.. ومش محتاجة دلوقتي ويحتاجه كمان 15 سنة من أجل أولاده.. لازم نتجاوز النقطة دي.. مواطنين وشعب.. حجم كبير من المساكن اللى بشوفها على الدائري مش مسكونة.. مفيش شباك راكب".
وتابع الرئيس السيسي: "حجم التحدي، أكبر من اللى بنفكر فيه، الزملاء اللى بيناقشوا.. لما بنعمل حاجة زي الدائرى الأوسطى شوف بتخدم كام محافظة.. القاهرة الكبرى والمحافظات القريبة منها".
وأكد الرئيس، أن الدولة المصرية موجودة على شريط ضيق.. ومش موجود في دول كتير"، متابعا: "حجم الحركة عالى أوي.. محدش حلم يجيب كام أتوبيس نيلي جميل محترم ضمن خطط الدولة لتطوير حركة المرور في جميع أرجاء الدولة".
وقال الرئيس السيسي، رئيس الجمهورية، تعليقا على المواضيع المثارة حول اشتراطات البناء الجديدة: "لو عاوز أفضى علشان أعمل محورين علشان يبقا متنفس للناس.. تراخيص البناء فيها نقاش كتير بسمع وبشوف تعليقات الناس .. مش هنزود على بلدنا ..لا لا .. وإذا كان الأمر نشرح للناس أكثر".
وأضاف الرئيس السيسي خلال افتتاح عدد من المشروعات في الجيزة: "الكتل دى حول القاهرة .. طيب يا جماعة يبقى فيه صيغة لحل المسألة .. الاشتراطات مش ضد الناس.. في إسكندرية أبراج 17 دور في شارع 6 متر.. بنعمل في برج العرب والعامرية مدن علشان توفر سكن للمحافظة مش هقفل عليك.. مش هنسيب الناس كده".