رد النجم تامر حسني على الجدل المُثار خلال الفترة الأخيرة بينه وبين الهضبة عمرو دياب حول جدل الأعلى استماعا في الوطن العربي.
وقال تامر حسني في المؤتمر الصحفي لحفله بمهرجان موازين: المنصات بتبقى متقلبة طول الوقت، في مثلًا فنان بينزل بألبوم فبيطلع علشان ده بيتسمع، وفي فنان تاني بينزل بألبوم فبياخد فرصته، الفكرة أن ده كان موقف كنت بشرح فيه أن أنا لما كنت رقم واحد في الفترة دي أنا احتفلت بـ ده، بس طبعًا احترامًا لكل الزملاء محبتش أحط صورهم وأقول أنا رقم واحد وهما تحت لأني بحترم مجهود كل الناس، وعارف أني لما أقول أني في المركز الأول كان في حد قبلي الأول وبعدين أنا هنزل وهيطلع غيري وده طبيعي بس يمكن أنا محبتش أحط صور الفنانين تحت مبحبش أنا الفكرة دي ومش طريقتي.
وأضاف تامر حسني: كل فنان حر يحتفل إزاي، وأكيد كل فنان بيتعب وبيغير على شغله، فلما يحس أن حد مدالوش حقه ممكن يزعل ويتسائل ليه بيحصل كده، وفي الآخر إحنا أحباب وعمرو دياب فنان كبير إحنا كأجيال اتعلمنا منه وأنا بحبه على المستوى الشخصي والفني، وأنا بحترم جيلي جدًا كلنا أصحاب وطلعنا مع بعض.
ودائما ما يُثار الجدل حول من يستحق لقب الأعلى استماعا في الوطن العربي هل هو عمرو دياب أم تامر حسني.