الفن

تحدث الفنان سامح صفوت على أهم درس تعلمه من مرضه بعد الوعكة الصحية التي تعرض لها خلال الفترة الأخيرة. 

وكتب سامح صفوت عبر حسابه الرسمي بموقع التواصل الاجتماعي “فيسبوك”: الحمد لله على الشدة اللي عرفت الواحد مين اللي ظهر وقت التعب ومين اختفى، المرض كان وجع بس نعمة من عند ربنا لازم نشكره عليها،  وإنه كشف عن الناس الأصيلة اللي دعواتها كانت بتوصل شايلكم في قلبي والله. 

وأضاف: ولولا الشدة اللي الواحد مر بيها مكنش هيعرف الفرق بين شخصيات في حياته، مين الصاحب او ابن الناس الاصيل الجدع اللي بجد او حتى معرفتي حديثة العهد بيه اشكره من كل قلبي، ومين اللي كان بيني وبينه عيش وملح، وعشرة سنين طويلة وماعملش بيها وكان صاحب مصلحة، مع إن الواحد متربي من والده ووالدته رحمهما الله والبيت اللي طالع منه إنه يصون العيش والملح،  ويراعي العشرة سواء في مجال الحياة الشخصية أو العملية.

وتابع: ناس كنا فاكرينها قريبين اتبخرت وناس مكناش نتوقعها كانت أول الحاضرين بالسؤال والدعوة والكلمة الطيبة، درس والواحد اتعلمه ومش هيتنسي،  الحمد لله عدت على خير وطالع منها متعلم حاجة جديدة على رأي المثل الانسان طول ما هو عايش بيفضل يتعلم

واستكمل:  واللي متابعيني وجمهوري اللي انتوا بالنسبة لي اهلي واخواتي وعيلتي الكبيرة باشكركم من كل قلبي، واشكر كل حد كتب لي كلمة ودعوة طيبة من قلبه، كمية الدعوات اللي جاتلي وأنا تعبان على صفحاتي و صفحات الغير ، وعلى كل المواقع فوق الوصف،  وفيها كمية حب صادق من القلب.

وواصل: كل واحد سأل عني من الوسط الفني والاعلامي والقانوني اللي هو مجال عملي الاساسي بصفتي محام مستشار قانوني بالنقض، حسيت إني بتعافى بفضل ربنا وقدرته ثم دعواتكم اللي وصلت وحسيت بيها وكانت سند ودعم وحسيت إن الدنيا لسه بخير وفيها ناس صافية ونقية زيكم

واختتم: ربنا ما يحرمني من محبتكم ويكتب لكم أجر كل دعوة ويحفظكم ويجازيكم كل خير وما يكتب على حد المرض والضيق والشدة، بس لو جت اعرف إنها هتنضف حياتك، وحسبي الله ونعم الوكيل وفوضت أمري إليه في كل من آذاني في حياتي وكان السبب فيما جرى، ياترى حد فيكم مر بشدة في يوم من الأيام عرفته الناس على أصلها.

أزمة سامح صفوت الصحية

وتعرض سامح صفوت لوعكة صحية خلال الفترة الأخيرة دخل على إثرها  أحد المستشفيات، لتلقي العلاج اللازم.