الفن

تحدثت الفنانة عايدة غنيم عن تجاهل المنتجين لها، وعدم ترشيحها في الأعمال الفنية منذ عشر سنوات.
 

وكتبت عايدة غنيم عبر حسابها بموقع التواصل الاجتماعي “فيسبوك”: معقولة الفنان يكون ملوش وجود وهو عايش ويبقى له وجود بعد موته، ولا هو لازم نموت أو نشحت الشغل عشان تحسوا بينا، ويا ريت تشغلونا قبل ما نموت.

وفي وقت سابق،تحدثت عايدة  غنيم عن تواجدها المستمر على منصة "تيك توك"، موضحة أنها تعتمد على أرباحه للإنفاق على ابنها، مؤكدة أن ما تحققه من مكاسب مادية عبر "تيك توك" يفوق ما تجنيه من التمثيل.

أخر أعمال عايدة غنيم 

جدير بالذكر أن أخر أعمال عايدة غنيم هو  مشاركتها في مسلسل آه من حوا الذي سبق عرضه عام 2016.

وتحدث عايدة غنيم منذ أيام الظلم والقهرة التي تعرضت له الفنانة الراحلة سهام جلال التي رحلت عن عالمنا الثلاثاء الماضي. 

وقالت عايدة غنيم من خلال فيديو نشره عبر حسابها على تطبيق “تيك توك”: “سهام ماتت وسابتهالكم، يارب ترتاحوا أو ارتاحوا بشع وطمع وتقطيع في بعض، أقسم بالله لغاية لما روحت المستشفى أنا مكنتش مصدقة، كان نفسي تطلع إشاعة، فجأة مشوفتش قدامي غير الناس اللي بتقطع في بعض وبتاكل في بعض وبتتكلم في ضهر بعض، كل ده عشان الفلوس وعلشان حاجات مالهاش أي لازمة.

وأضافت: نسينا إن الدنيا دي مالهاش أمان، وإن البني أدم ممكن في لحظة ينام وميصحاش تاني، أنا مش قادرة أستوعب، بس بقولكم اطمنوا لكل واحدة اتكلمت في ضهرها، وعايزة أقولكم حاجة هي لآخر لحظة كنتوا أنتوا أخصامها عند الله، وقايلالي بالاسم، أنا بس قولت أقولكم يارب ضميركم يكون مستريح، وتقدروا تناموا على المخدة كده وأنتوا كنتوا ظلمينها أو افتريتوا عليها للأسف أنا مش قادرة أقول أساميكم لأنكم أنتوا صحابي.

وتابعت: بس أنا سهام بالنسبالي كانت أنضف بني أدمة، اتظلمت كتير من أقرب الناس ليها ومن ناس كانوا عاملين أنهم أصحابها، كانت أقرب حد ليا، كانت البني أدمة الوحيدة اللي كنت بتصل أفضفض معاها في حاجات كتير أوي، أنا كان نفسي أشوفها بجد قبل ما تموت، ياريت تدعولها وتقرولها الفاتحة ربنا يتجاوز عن سيئاتها ويديها على قد نيتها، ويعوضها في الآخرة عن اللي هي شافته في الدنيا.

واختتمت: أنا عمري ما توقعت ولا تخيلت أني ممكن أطلع بالمنظر ده واتكلم في حاجة زي كدة،  أنا من قهرتي وحرقة قلبي بجد مش قادرة نفسي أقولكم واحد واحد وواحدة واحدة، بجد الله يسامحكم على كل حاجة أنتوا عملتوها فيها، بس هي مش مسامحاكم، هي راحت للأحسن مني ومنكم اللي هيجيبلها حقها، وأنتوا ربنا يعينكم على نفسكم بجد.