رد السيناريست محمد صلاح العزب مؤلف فيلم سفاح التجمع بطولة أحمد الفيشاوي على الانتقادات التي وُجهت للفيلم، مشيرا أن هناك العديد من الأعمال الفنية التي تناولت مثل هذه المواضيع.
وكتب محمد صلاح العزب عبر حسابه الرسمي بموقع التواصل الاجتماعي “فيسبوك”: مع كامل الاحترام لكل الآراء طبعابس الناس اللي معترضة على وجود عمل فني اسمه سفاح التجمع، وبيقولوا هو ليه وإزاي وإيه الفايدة إننا نعمل فيلم عن شخصية سفاح
وأضاف: هو ده أول فيلم في التاريخ يتعمل عن شخصية إجرامية، فمستغربين ومندهشين جدا، عمركم ما سمعتوا عن آلاف الآفلام والمسلسلات في تاريخ السينما والمسرح والتلفزيون والمنصات عن مجرمين.
وتابع: ولا كل مرة هتستغربوا وتندهشوا نفس الاندهاش، والكلام بتاع ما تعملوا عن شخصيات تاريخية ولا علماء ولا شخصيات مفيدة، طب ما هو برضه ده بيتعمل بشكل دوري، وغالبا ما بيلاقيش نجاح ولا رواج جماهيري، بما يعني إنكم مبتتفرجوش على الأعمال دي أصلا.
واستكمل: وفكرة إن لما المشاهدين يشوفوا السفاح في فيلم الناس كلها هتتحول سفاحين عشان يقلدوه، ده برضه منطق غريب، ما طول الوقت الأعمال الفنية بتعرض مجرمين وقتلة وسفاحين ودكاترة وظباط ومحامين وسواقين أوبر وعادي، جمعية ودايرة، والمشاهد مش بالسذاجة إنه كل ما هيشوف شخصية هيقلدها.
واختتم: والمفاجأة إن الفن بينقل من الواقع مش بيسبقه، وفي المجمل إحنا بناخد نماذج حقيقية وإحنا اللي بنقلدها مش هم اللي بيقلدونا، قليل من المنطق، حياكم الله، وإن شاء الله المشروع القادم هعمل فيلم عن الدكتور مجدي يعقوب أطال الله في عمره، كل سنة وأصحاب كل الآراء طيبين وسعداء، ودمتم سالمين.
قضية فيلم سفاح التجمع
ويتناول الفيلم في إطار من الجريمة والتشويق قصة قاتل متسلسل يُدعى كريم، نشأ وحيدًا يبحث عن ذاته، فوجد ضالته في عصيان عائلته، وبعد سنوات يقيم علاقة مع فتاة جميلة، ويبدأ سلسلة جرائم قتل لعدد من النساء.
فريق عمل فيلم سفاح التجمع
ويضم فريق عمل فيلم سفاح التجمع نخبة من النجوم منهم أحمد الفيشاوي، وصابرين، وجيسيكا حسام الدين، وإنتصار، ونور محمود، وسينيتا خليفة، ومريم الجندي، وآية سليم، والفيلم من إنتاج أحمد السبكي، تأليف وإخراج محمد صلاح العزب.