الرياضة

كشف حسام عبدالمنعم، لاعب الزمالك ومنتخب مصر السابق، عن تفاصيل مأساوية لحياته بعد اعتزال كرة القدم، في ظل ابتعاده عن المشهد الرياضي خلال السنوات الماضية.

وقال حسام عبدالمنعم في تصريحات إذاعية: « أنا عندي 5 أولاد وعايش من غير دخل ولا مصدر رزق يُسترني ويُسترهم رغم إني كنت لاعب دولي في الزمالك، سنين وأنا قاعد عاطل من غير شغل، من بعد ما كنت فى عز الشهرة والمجد».

حسام عبدالمنعم: أبويا كسرني بعد الاعتزال في الزمالك

وتابع: «حاليا بعيش أصعب فترة في حياتي، الوجع كبير، لدرجة إن أبويا اللي كان بيفتخر بيا زمان مرة بكي بدموعه علي حالي وقاللي: «ًيا ريتك ما لعبت كورة »، الكلمة دي كسرتني، لأنه شايفني بتسول الشغل والمصاريف.. ونادي الزمالك ماعملش معايا حاجة، والكل خذلني، عايش لوحدي في بحر واسع من غير مجداف».

وأضاف حسام عبدالمنعم: «أنا دلوقتي مليش غير ربنا وبقوله فك كربي، انت اللي هتسترني، وتُجبر كسري، هوّن عليا نظرة عيالي اللي بتوجعني، أنا عايز أعملهم حاجة، أفرحهم، أديهم أمل، بس أنا عاجز ، وعندي يقين في نفس الوقت إن ربنا مش هيخذلني زي ما الناس خذلوني، وبيجبر الخاطر مهما كان الوجع تقيل».

وواصل لاعب الزمالك السابق: « المجال الرياضي مش حلو خالص، ومش عارف أشتغل فيه، وأنا طول عمري معرفش غير الكورة شغلانتي وقاعد في البيت مش بشتغل، وأنا عندي زوجتين و5 أطفال محتاجين مني كل حاجة، مليش صاحب ولا صديق في الزمالك رغم إني قضيت أفضل سنين عمري جوه النادي، صاحبي وصديقي هو ربنا وطول الوقت بكلّمه وأعيط، دلوقتي محدش بيسأل عليا من اللي كنت بلعب معاهم ولا حد بيكلمني، بقيت بكلّم ربنا عن أكل عيشي ورزقي، هو بس اللي سامعني وعارف حالي».

حسام عبدالمنعم: لولا الرضا بالحال كنت خسرت حياتي

وأردف: « أنا خريج كلية سياحة وفنادق، بس الحقيقة إني معرفش عنها حاجة، طول عمري من وأنا عندي 8 سنين وأنا معرفش غير الكورة، لعبت 8 سنين في النادي الأهلي وبعده الزمالك، جيلي في الناديين كله أسماء كبيرة، رغم كل ده، أنا دلوقتي قاعد بعيد عن الملاعب، بعيد عن الأضواء، واللي كان زمان حلمي الكبير بقى دلوقتي ذكرى، وأنا مستني الفرج من ربنا ضهري وسندي، وهو اللي بيهون عليا كل وجع».

واختتم: « أنا طول الوقت قُريب من ربنا، ولولا الرضا بالحال كنت خسرت حياتي، لما بفكر إزاي كنت ملء السمع والبصر وإزاي بقيت دلوقتي، فأعرف إن ده كله اختبار من ربنا».