الفن

أعرب الموسيقار أحمد أبو زهرة نجل الفنان القدير عبدالرحمن أبو زهرة عن حزنه الشديد مما يحدث مع والده والحجز على معاشه من مصلحه الضرائب، مشيرا إلى أن والده لا يعمل منذ عام 2020.

وقال أحمد أبو زهرة في تصريح خاص ل بصراحة: دي تاني مرة تحصل مش أول مرة يوقفوا المعاش بتاعه الضرايب.. هو والدي من 2020 مش بيشتغل ووقع وعمل عمليات كبيرة ووقف شغل نهائي.

وأضاف: يعني إنتوا بتطالبوني بضرايب وهو مش شغال أصلا؟.. لا وبيقولوا ليا اثبتلنا انه مشتغلش.. آخر ضرايب أنا دافعها بنفسي 2020.. مش هقعد أضيع وقتي وحياتي مع مصلحة ضرايب بدور على أي مشاكل فجأة الشهر ده حجزوا على حسابه مينفعش بجد اللي حصل ده.

واختتم: "مش أول مرة يوقفوا معاش والدي.. هو من سنة 2020 مش بيشتغل أصلا، روحت أكلمهم لقيتهم بيقوا أثبتلنا.. طب ده ينفع إنتوا بتدوروا على أي مشاكل وخلاص مينفعش بجد.

الحجز على معاش عبدالرحمن أبو زهرة

وكان أحمد أبو زهرة قد أعلن الحجز على أموال والده من خلال منشور كتبه عبر “فيسبوك”، والذي جاء كالتالي:  هل مؤسسات الدولة مش وراها غير عبدالرحمن أبو زهرة بدل ما يتم تكريمه من الدولة، كل فترة يحصل موقف مهين له مع انه لا هو عاوز حاجة من حد ولا مد إيده لحد ولا طلب اي شيء من أي انسان كل اللي هو طلبه انه يعيش أيامه الأخيرة في هدوء وسلام نفسي".

وأضاف: المرة دي مصلحة الضرايب بتهينه وتحجز عليه وياريته مثلا عنده املاك ومليارات في البنك لا دي بتحجز علي معاشه اللي مش بيكمل ربع ثمن الادوية اللي بياخذها، تم وقف حسابه البنكي اللي مفيهوش غير المعاش وحينما سألنا عن السبب قيل انه محجوز عليه من الضرايب".

واختتم:  يا سيادة رئيس مصلحة الضرايب ارحموا فنان أفني أكتر من ستين سنة من عمره في خدمة هذا الوطن، ولم يتأخر طوال حياته في دفع كل الضرايب بل علي العكس من يقول غير ذلك فهو ظالم.