الرياضة

تحدث الإعلامي أحمد حسن، عن كواليس منتخب مصر المشارك في كأس العرب، وأسباب الخروج من البطولة بعد الخسارة من الأردن في اللقاء الأخير من دور المجموعات.

تصريحات أحمد حسن

قال أحمد حسن: “مبقاش معايا ست أو سبع لاعيبة أساسيين، إنت بتتكلم قوائم فرقة، ولاعيبة جاهزة، ولاعيبة عندها خبرات، ولاعيبة مميزة، ما بقوش موجودين معاك ليه، علشان ما تأجلش مباراتين في الدوري، يعني مصلحة الدوري ولا مصلحة بلدنا؟ ما بقيناش عارفين”.

وتابع عبر برنامج الكابتن: “بيراميدز لما ساب مروان حمدي، هو ما سابوش دعمًا للمنتخبات الوطنية والكلام اللي بيتقال ده، لا هو سابه لأن وليد الكرتي راح مع منتخب المغرب، وحصل تواصل من الاتحاد المغربي، فبناءً عليه قال لك هيبقى شكلنا وحش”.

وأكمل: “أدي مروان حمدي مقابل وليد الكرتي علشان ما يبقاش الشكل وحش ده للتوضيح، إنت لما تروح تبدأ تشوف اللاعيبة اللي موجودة، البدائل اللي موجودة، أكيد مش نفس الناس”.

وواصل: “محمد إسماعيل كان معانا، بعد كده الكابتن حسام حسن خدّه المنتخب الأول، وما عندناش أي مشكلة خالص، صلاح محسن كنا عايزينه يبقى معانا، انضم للمنتخب الأول، ما عندناش أي مشكلة خالص”.

أزمات منتخب مصر المشارك في كأس العرب

وأضاف: “الجهابذة اللي بيتكلموا يقول لك، طب ليه ما أخدتش طاهر محمد طاهر، طب ليه ما أخدتش أحمد نبيل كوكا، ما هو دول كلهم كانوا في المنتخب الأول، أنا ما أقدرش أجي عند حد من المنتخب الأول، لأن الأولوية للمنتخب المشارك في كأس الأمم الإفريقية”.

وذكر: “أنا أعرف منين، أنا لازم أبعت قائمتي، لازم أبعت 23 لعيب، أعرف منين دول هيكونوا موجودين ولا مش موجودين، كابتن حلمي، يعرف منين اللاعيبة دي هتكون موجودة ولا مش موجودة”.

وأشار: “إمام عاشور كان معانا من ضمن الـ 55 اسم، بس إنت مش عارف تاخده معاك ولا، لو خدته معاك تحصل أزمة بعد كده، فيبدأ يقول لك طب إنت خدته ليه، لا، إحنا واخدينه منتخب أول”.

وأتم: “في غياب في التنسيق طبعًا، أكيد كان في غياب في التنسيق، بس خلاص مشينا وقبلنا وفي الآخر، في تقصير، وما ظهرناش بشكل كويس”.