الرياضة

تحدث عمرو السولية لاعب نادي سيراميكا كليوباترا الحالي والأهلي السابق، عن تفاصيل انضمامه للمارد الأحمر في الوقت السابق، ومسيرته داخل جدران التتش.

انضمام عمرو السولية للنادي الأهلي

قال عمرو السولية: “كان فيه عرض من الأهلي والزمالك وأنا كنت عاوز أسافر برة مصر، وقتها في الاسماعيلي مكنتش باخد فلوس خالص، ورئيس الاسماعيلي قالي مش هينفع أوديك الأهلي الناس بتوع البلد هيدبحوني لو عاوز تروح الزمالك هاخدك أوديك من ايدك دلوقتي”. 

وتابع عبر بودكاست الإيجيبشين ليج: “قولتله أنا مش حابب أروح الزمالك، رئيس الاسماعيلي طلع في الإعلام قال إن أنا مضيت للأهلي، وأنا مكنتش قعدت مع حد أصلا والناس قعدت تشتمني على الفيسبوك، بعد الموقف ده قولت لوكيلي يلا بقى نروح نقعد مع بتوع الأهلي ونخليها بجد بقى واتفقنا”. 

وأكمل: “كابتن طارق العشري طلبني في الإمارات، وقبلها كنت ماضي رغبة للأهلي، إن لو حصل حاجة ورجعت مصر هرجع للأهلي”.

وزاد: “لعبت 6 شهور هناك وكابتن طارق مشي والمدرب الجديد قرر يغير المحترفين كلهم، وقالولي ممكن تكمل عقدك وتتمرن مع الناشئين، وخلصنا مع الأهلي بس الموضوع كان صعب، عشان الناس في الإمارات كانوا واخدين فكرة إن أنا رايح كوبري”.

وأضاف: “أول ما جيت الأهلي قعدت فترة طويلة مبشاركش، وأحيانا كنت أسافر مع الفريق وأطلع برة القايمة، كنت باجي قبل التمرين بساعتين، أتمرن في الجيم وبعد التمرين كنت بتمرن تاني لو قادر”. 

وأردف: “لما مكنتش بلعب كنت بتمرن أحسن برضو وبكمل، ومطلبتش أخرج إعارة ولا اتكلمت مع حد، لحد ما كابتن حسام البدري جه وخدت فرصة وكملت أساسي”.

رحيل رمضان صبحي عن الأهلي

وذكر السولية: “متوقعتش إن رمضان صبحي يمشي من الأهلي، كانت مفاجأة بالنسبة لنا كلاعيبة، خصوصا إنه ابن النادي والفرقة قايمة عليه وهو المستقبل، والناس كانت شايفاه حاجة كبيرة وكانت متوقعة له حاجة أكبر في المستقبل”. 

وأتم حديثه: “اللي زعلت عليه إن عنده فرصة يحترف تاني، أنا بحب رمضان جدا وهو لاعب جامد جدا وكنت أتمنى يكمل معانا، واللي زعلني منه أو من أي حد إن جاله فرصة يسافر ويحترف ويكسر الدنيا، لأن إمكانياته كبيرة وياخد قرار تاني، كان نفسي يا يكمل عندنا أو يحترف”.