عبر حازم إمام نجم الكرة المصرية السابق، عن حزنه الكبير بعد وفاة صديقه الراحل محمد صبري، إثر تعرضه لحادث مروع في الساعات الأولى من صباح اليوم.
حزن حازم إمام على رحيل محمد صبري
بدأ حازم إمام حديثه: “البقاء لله لنا ولكل المصريين، والله ربنا يرحمه ويغفر له، صدمة طبعًا، وكل شيء بيد ربنا، وكلنا راضون بقضاء الله، لكن الصدمة إن صبري كان لسه إمبارح بيكلمنا وكلنا شايفينه بصحة كويسة”.
وتابع عبر قناة الزمالك: “ربنا يا رب يصبّر أهله وبناته وزوجته وعيلته ويصبّرنا جميعًا، إحنا أصحابه وإحنا جيل كبير عشناه مع بعض أكتر ما عشناه في بيوتنا”.
وأكمل: "صبري واحد من أهم اللاعبين اللي جم نادي الزمالك، ومن أحرف اللاعبين، وكان في جيلنا هو الرقم واحد، وكلنا كنا بنقول "ده هيبقى حاجة كبيرة جدًا جدًا"، وهو فعلًا حاجة كبيرة، لكنه مخدش حقه من الصحافة والإعلام، ومقعدش كتير".
وزاد: “شخصية جميلة جدًا، طيب جدًا، ولذيذ جدًا، وصبري كان دايمًا في المنتخب أخف دم في العالم، وكان معروف إن تجمعنا كله يبقى عنده في الأوضة، وبنقعد ورا في الأوتوبيس مع بعض نهزر ونضحك”.
وأضاف: “لما كبر، تحس إنه اتطور جدًا إعلاميًا، وبقى مذيع محترم وبيهتم بكل كلمة، وبيتكلم بلباقة كبيرة، واشتغل مدرب سنين طويلة جدًا، في القطاع، وفي الفريق الأول، يعني اشتغل لعيب ومدرب ومذيع في القناة، وربنا يرحمه إعلاميًا كبيرًا”.
تصريحات حازم إمام
وأوضح: “للأسف أنا لسه بره مصر عندي شغل، ومش هعرف أرجع دلوقتي، عرفت الخبر النهارده الصبح، وجمال حمزة كلمني، ومحمد صبري يستاهل حاجة كبيرة، وأنا عندي ثقة إن ده هيحصل إن شاء الله، وإدارة نادي الزمالك أكيد هتعمل حاجة تليق بيه”.
وذكر: "إحنا بنتكلم دايمًا عن الزمالك والأهلي والكلام اللي مش بيقدم ولا يأخر، لكن للأسف الناس مبتشوفش قيمة الموضوع غير لما حد يتوفّى، يقولوا بعدها "الكورة مش مستاهلة"، وبعد يومين نرجع نشتم بعض تاني وندخل في نفس الدائرة".
وأردف: “السوشيال ميديا ليها فوائد، لكن ليها عيوب خطيرة جدًا. أنت يا بني آدم بتشوف شتيمتك بعينك، وتشوف الناس بتتكلم عليك بشكل وحش، وزمان مكناش بنشوف ده، لكن دلوقتي أي كلمة تقولها عن الزمالك أو الأهلي، الناس اللي ضدك تشتمك وتقلل منك، والحاجات دي بتحبط الواحد نفسيًا وبتضايقه جدًا”.
وأتم حازم إمام حديثه: “أتمنى اللي حصل النهارده يخلي الناس تتعظ شوية، وتخلّي النقد باحترام، ويخلّي اختلاف الآراء ميفسدش للود قضية.. في الآخر إحنا بنتكلم في الكورة”.