الرياضة

وجه ياسين منصور المرشح على منصب نائب رئيس النادي الأهلي، رسالة خاصة إلى أعضاء الجمعية العمومية بشأن الانتخابات القادمة.

رسالة ياسين منصور إلى جمعية الأهلي العمومية

قال ياسين منصور: “أحب أرحب بكل جماهير الأهلي اللي بنحبها وبنعشقها”. 

وتابع عبر الموقع الرسمي للنادي الأهلي: “وبرضو برحب بكل أعضاء الجمعية العمومية، ونتمنى إن شاء الله يشاركونا يوم 31 في الانتخابات، وإننا نكون على قدر المسؤولية والثقة اللي شايفينها فينا”.

أسباب ترشح ياسين منصور في انتخابات الأهلي

وأشار ياسين منصور: “قررت الترشح في انتخابات الأهلي لكذا سبب، ومنها أسباب شخصية الفترة اللي فاتت كان صعب عليه بسبب ضغط الشغل، وعشان أبقى نائب رئيس الأهلي هيكون محتاج وقت مني ودلوقتي ابني انضم لأعمالي وشايف ان الوقت ده مناسب اني ادخل انتخابات الأهلي”.

وتابع في تصريحات تليفزيونية: كابتن الخطيب أسطورة كروية مصرية وأهلاوية، لكن النهاردة تعبان شوية واتقاله لازم يرتاح".

وذكر: "اختياري كان بين إنزل أنا كرئيس أو أنزل كنائب، أنا قلتله أنا عاوزك تبقى رئيس لأني أنا مقدرش أجي من بره وعلى الأقل من 3 إلى 5 شهور أعرف إيه اللي جوه".

تصريحات ياسين منصور

وأضاف: “أنا عاوز ادخل اخد وقتي لفهم أمور النادي وأخد قرارات على أساسه وانا بحلم في الأهلي ان لازم كل واحد في كل حتة KPIs واضحة بيتحاسب عليها وعارف ايه المطلوب منه بالظبط والمفروض منه يأديه ونشوف أحدث ما وصل فيه العالم في الإدارة الرياضية وبنطبقه هنا”.

وأكمل: “أنا شايف الأهلي ما يلعبش في أفريقيا يلعب في أوروبا ويلعب في دوري الأبطال والإتحاد الأوروبي، براند قوي في الشرق الأوسط وأنا بآمن دايما في البراندز، شايف الأهلي براند رهيب وولاد النادي الأهلي لهم طبيعة خاصة انهم النادي هو الأهم مش أنا هاعمل إيه وأنا وظيفتي إيه وأنا شغلتي إيه”.

وأتم ياسين منصور حديثه: “أنا بشجع الأهلي من وأنا عندي 4 سنين ، أنا إسكندراني وكنت بروح ماتشات الأهلي لما ييجي يلعب في الإسكندرية وانضربنا كتير من الإتحادوية وكملت حب الأهلي”.