الرياضة

تحدث الناقد الرياضي شادي حبشي، عن الفارق بين الأهلي ومختلف الأندية المحلية، والأسباب التي تؤدي إلى نجاح المنظومة الحمراء.

تصريحات شادي حبشي

قال شادي حبشي: “الأهلي مش مسئول عن حد تاني ولا مسئول عن أن نادي تاني بيعمل إيه عنده، توفير المناخ اللي أنت عاوزه ده بيبدأ داخليا، والزمالك عنده مشاكل داخلية من التسعينيات”.

وتابع عبر برنامج الكورة مع فايق: “لو أنت قوي داخليا هتعرف تبقي قوي خارجيا، أنا كأهلي مش مسئول إن عندك المشاكل، دي أنا بركز مع نفسي وبسلم جيل ورا جيل، فيه مدرسة ماشيين عليها في الإدارة وده مش موجود في الزمالك، من 2004 الزمالك دخل المحاكم أكتر من الملاعب”.

وأكمل: “أنا مش مسئول لما واحد يخسر انتخابات فا يرفع قضية، والأرض موجودة مع الزمالك من 2003 قعدت 20 سنة مش عارف تحط فيها طوبة، ولما أخدت مهلة أخيرة روحت اشتغلت آخر شهر بس، وفي الآخر تقول وفرلي المناخ اللي عند الأهلي”.

الفارق بين الأهلي والزمالك

وزاد: “لما الأرض بقى سعرها ضرب في 100 عاوز تعمل عليها استثمارات، ولما الدولة تقولك وقف تقول أنتوا بتحاربوني، الزمالك حربه من جوا، واللي بيحارب تجربة جون إدوارد، ما هو من جوه من أبناء الزمالك والأهلي بره القصة دي خالص”.

وأضاف: "مفيش حاجة اسمها اديني زيه، مفيش حاجة اسمها أجي أقولك اديني شقتك وعربيتك وشوف أنا هعمل إيه،
أنا أعرف رئيس نادي اسمه مرتضى منصور دخل اتحاد الكورة ودفع باب الحمام عشان يقيد لاعيبة، وتسبب في 30 قضية ضد الزمالك في الفيفا واتسبب في كمية مشاكل ليها علاقة بحكام ومشاكل عالهوا".

وأشار: “هل الـ 45 بطولة دوري بتوع الأهلي بسبب التحكيم، ده مشكلة الأهلي في ماتش الانسحاب إن الأهلي عاوز حكم أجنبي والزمالك قالوا عاوزين حكم مصري”.

وأتم: “في حين أنك لعبت نهائي الكأس قدام بيراميدز بحكم مصري، وكسبته وواضح إنكوا مبسوطين من الحكام المصريين، قضايا وكلام كتير أوي أوي عشان نبين إن الأهلي بيستفيد من المنظومة وبس، هي المظلومية وصلت لكده”.