الرياضة

تحدث حمادة عبد اللطيف نجم الزمالك السابق، عن تاريخ الحديث على مجاملة الأهلي من جانب الحكام، وكذلك المواجهات أمام الأحمر.

تصريحات حمادة عبد اللطيف

قال حمادة عبد اللطيف: “من أول ما دخلت الزمالك وأنا 15 سنة بسمع الكلام بتاع الأهلي بيكسب بالحكام، أول ما دخلت قطاع الناشئين والمدرب بتاعنا وبعض المسئولين واحنا رايحين الماتش قالوا خلوا بالكوا من الحكام هيجاملوا الأهلي ويكسبوه الماتش”. 

وتابع حسابه على فيسبوك: “لما لعبنا الماتش والفريقين كانوا كويسين وكنا موفقين وكسبنا الأهلي، الحكم كان متميز جدًا ومحسيتش بأي ظلم لنادي الزمالك”. 

وأضاف: “الموضوع اتكرر في ماتشات كتير ولما نبقى وحشين ونخسر يقولوا الحكام جاملوا الأهلي، طب ما أنت كسبت قبل كده، مقالوش أنه جاملك ليه”.

وأكمل: “موضوع بقى متكرر وسخيف، الأهلي معاه 45 دوري ويتقال أصل الأهلي بيكسب بالحكام، هتكسب 45 بطولة دوري بالحكام، يعني هو الأهلي مبيلعبش خالص ومعندهمش نجوم ولعيبة مميزة”.

حمادة عبد اللطيف نجم الزمالك السابق

وزاد: “كلام سخيف ومبيعجبنيش، الأهلي 39 بطولة كأس مصر والناس المغيبة مش عاوزين يعترفوا بالحقيقة، طب ما الزمالك 29 بطولة كأس وقريب من الأهلي، ليه منقولش إن الزمالك كسبهم بالحكام”.

وأكد: “أنا بحب الكلام الموزون دايمًا بالعقل مش بالعاطفة ولا الانتماء، الأهلي كسبان 12 بطولة إفريقيا واحنا ماخدناش إفريقيا من 23 سنة وده مخليني حزين، ممكن تتجامل مرة أو مرتين خصوصًا الأهلي أو الزمالك لما ليهم من شعبية طاغية، لكن هتتجامل في كل البطولات دي”. 

وأتم عبد البطيف حديثه: “أنا بتكلم في الحق ومبخافش غير من اللي خالقني، مبحبش موضوع المظلومية اللي عايش فيه بعض مسئولين وجماهير الزمالك، لما كنت كويس خدت إفريقيا والدوري ومحدش ظلمك ولا ضايقك، فيه ناس بتغير الحقيقة عشان مش ناجحين ولا بيكسبوا”.