الفن

كشف عمرو منسي، المدير التنفيذي لمهرجان الجونة السينمائي تفاصيل الدورة الثامنة لمهرجان الجونة السينمائي في المؤتمر الصحفي للمهرجان.

وقال عمرو منسي: أنا مبسوط جدًا إننا في المؤتمر الصحفي للدورة الثامنة من مهرجان الجونة السينمائي، ومتحمس كمان إننا نكمل نجاح السنين اللي فاتت. النجاح ده بيخلينا نفكر دايمًا: إيه الجديد اللي ممكن نقدمه؟

وأضاف: المهرجان مع الوقت أصبح مساحة أمل لكل المواهب والشباب، وبقى مكان بيجمعنا حوالين فكرة واحدة وهي: قد إيه الفن يقدر يغير. وعلى مدار الدورات السابقة، مهرجان الجونة أثبت إنه رقم مهم على خريطة المهرجانات في المنطقة والعالم، وده بفضل تأثيره الكبير في صناعة السينما.

المهرجان مش بيكتفي بعرض أهم أفلام السنة من كل أنحاء العالم، لكنه كمان من خلال منصة "سيني جونة" بيحقق هدفه الأساسي: إتاحة الفرص للشباب وصناع السينما إنهم يعرضوا مشاريعهم على شركات إنتاج وتوزيع وجهات داعمة. والأجمل إن كل ده بيتم في مكان واحد هو الـHub، اللي أنا سعيد جدًا بنجاح فكرته واستمراره، لأنه سهّل حركة ضيوف المهرجان وقرّبهم من بعض.

وبنفس الفكر ده، السنة دي بنفعل مكان جديد وهو "مسرح الجزيرة"، اللي هيكون مساحة إضافية للجمهور في قلب مدينة الجونة، وهيستضيف ورش عمل وندوات ولقاءات ضمن Forum CineGouna Accreditation.

وفخور كمان باستمرار سوق "سيني جونة" للسنة التالتة، وزيادة عدد العارضين لـ30 شركة من 10 دول مختلفة. وده بيدي فرص أكبر لصناع الأفلام إنهم يقابلوا شركات مهمة على المستوى الإقليمي والعالمي. رقم آخر بيدل على أهمية منصتنا هو إن 290 مشروع اتقدموا السنة دي للمشاركة في "سيني جونة" لدعم إنتاج الأفلام.

كمان متحمس جدًا لبرنامجنا الجديد "سيني جونة لدعم المواهب الناشئة – Emerge"، اللي بيكبر سنة ورا سنة بدعم شركائنا: الاتحاد الأوروبي، ومؤسسة دروسوس، ومؤسسة ساويرس للتنمية الاجتماعية. وسعيد بالشراكة الجديدة مع جامعة إسلسكا اللي هتساهم في إتاحة فرصة أكبر للجيل الصغير من الموهوبين للمشاركة في فعاليات المهرجان.

ولأننا عايزين نتيح فرصة لجمهور أوسع لمتابعة المهرجان، سعيد بالإعلان عن شراكة استراتيجية مع MBC، ومنصة شاهد، وقناة النهار، لبث فعاليات الدورة الثامنة مباشرة على التلات منصات.

أما عن شعار المهرجان "سينما من أجل الإنسانية"، اللي ابتداه المهندس نجيب ساويرس من الدورة الأولى، فالسنة دي بينتقل لمستوى عالمي جديد ليصبح حركة سنوية بالشراكة مع الأمم المتحدة، نسلط الضوء من خلالها كل دورة على قضية إنسانية كبرى. البداية هتكون مع محور الأمن الغذائي، خصوصًا إن افتتاح المهرجان السنة دي بيتزامن مع اليوم العالمي للغذاء.

في النهاية، أحب أشكر كل الرعاة والشركاء اللي زاد حجم تعاوننا معاهم السنة دي، وأشكر صُنّاع السينما والفنانين، وكل الإعلاميين والصحفيين. وطبعًا لازم أشكر فريق العمل اللي بيشتغل بكل إخلاص علشان كل حاجة تطلع بأفضل صورة.

أشوفكم في الجونة، وهسيب دلوقتي الكلمة للسيدة إيلينا بانوفا، المنسقة المقيمة للأمم المتحدة في مصر.