تحدث الفنان أحمد سعد، خلال لقائه مع الإعلامية منى الشاذلي في برنامج «معكم» على قناة ON، عن ذكريات طفولته، مؤكداً أنه تعلم منذ الصغر أهمية العمل وتحمل المسؤولية، قائلاً: «من زمان أمي علمتني أخلص المدرسة ولازم أشتغل، هي مش عايزة فلوس في البيت، بس لازم أبقى مسئول».
وكشف سعد أنه عمل في سن صغيرة بمهن مختلفة لمساعدة نفسه وجيرانه، موضحاً: «كنت أوصل طلبات للناس بمقابل بدأ بشلن، وبقيت كأني أبليكيشن للمنطقة.. أي حد عايز حاجة يديني فلوس. وبعدها اشتغلت في النقاشة وحاجات كتير».
وأضاف أنه فضّل العمل على الترفيه، قائلاً: «لما صحابي كانوا يخرجوا ويلعبوا، أنا كنت بروح أشتغل علشان أثبت إني مش رايح لطريق وحش».
وأشار الفنان إلى أن وجوده في بيت يضم تسعة أفراد شكّل دافعاً لتنمية موهبته وإبراز نفسه، قائلاً: «ده سر الموهبة.. لما تعيش في بيت فيه 9 أفراد لازم يكون عندك حاجة تقدمها، وإلا هتتهرس».
وأوضح أنه بدأ مشواره الفني بقراءة القرآن والابتهالات، ثم الغناء لأم كلثوم وعبدالوهاب، قائلاً: «كنت بستنى يوم الجمعة عشان العيلة تتجمع وأظهر موهبتي».
واختتم سعد حديثه بالتأكيد على أن نظرة الإعجاب في عيون أسرته كانت دافعه الأكبر: «لحد دلوقتي بحب نظرة الإعجاب في عيون أهلي وإخواتي، وسعيت كتير عشان أوريهم إني كويس».