الرياضة

تحدث خالد الغندور نجم الزمالك السابق، عن تفاصيل المفاوضات مع علي ماهر، لتدريب النادي الأهلي، بعد الهزيمة أمام بيراميدز.

رحيل ريبرو عن الأهلي

قال خالد الغندور: “تعالوا نروح كده لبعض الحاجات، ريبيرو بيودع النادي الأهلي، وريبيرو بيشكر العمال اللي بيودعوه وبيقولوا له شكراً وكده، لكن 99% من اللاعيبة محدش نزل له حاجة على السوشيال ميديا ومش عارف ليه”.

وتابع عبر راديو أون: “ريبيرو أنهى مفاوضاته مع النادي الأهلي بالحصول على شهرين، وسيبكم من بعض الناس اللي طلعت قالت إن الراجل أول ثلاث شهور لو مشيته مش هياخد شرط جزائي”.

وواصل: “هو أنت أما جيت تتعاقد مع المدير الفني، اتقاله بقولك إيه بعد ثلاث شهور لو احنا مشيناك عشان احنا حاسين إنك احتمال تتعادل مع مودرن وتعمل ماتشات وحشة في كأس العالم، فاحنا بعد ثلاث شهور هنمشيك مش هتاخد ولا جنيه، فالراجل قال لك يا سلام تحت أمرك يا باشا، أي كلام في أي كلام”.

وأكمل: “وأقول لكم حاجة لذيذة كمان، من ضمن الحاجات اللي طلعت، قالك علي ماهر، وخدوا بالكم من الكلام اللي جاي ده، سبحان الله علي ماهر يوم ما الأهلي خسر من بيراميدز، ثاني يوم راح الشهر العقاري في النادي الأهلي، دي صدفة يا جماعة صدفة يعني”.

وزاد: “عايز أقول لكم حاجة، علي ماهر حبيبي يعني، فعلي ماهر ساكن في التجمع الخامس، فصحي الصبح مثلا عايز يجدد بطاقته، وده تجديد البطاقة ده يعني ممكن وأنت في الكشك اللي جنبك تجدد بطاقتك، خلاص بقى في مولات وفي كل حتة”.

مفاوضات الأهلي مع علي ماهر

وأشار: “طب سيبكم من القصة دي، طب في نادي أهلي في مدينة نصر وفي نادي أهلي في التجمع، ما هو الأهلي عنده خمس فروع يا جماعة، فسبحان الله علي ماهر راح صحي الصبح وطلع من التجمع يوم ما الأهلي اتغلب بالليل وقالك إيه أنا هطلع عندي شوية حاجات هعملها في الشهر العقاري”.

وذكر: “فراح اتمشى هناك شافوه وهو داخل، فقال لهم ده أنا داخل الشهر العقاري يا جماعة، فالنادي الأهلي وبعض المسؤولين بعد ما شافوه قالك تعالى يا علوة، أنت إيه اللي جابك هنا يا علوة، تعالى عايزين نتفاوض معاك شوية كده، ده أنت جاي بالصدفة سبحان الله”.

وأكد: “علي ماهر شخصية مستقلة، يعني محدش يعرف يسيطر عليه يقول له تعالى يمين تعالى شمال، وعنده فكر وراجل عايز يجي بالجهاز الفني بتاعه بالكامل”.

وأتم: “رد علي ماهر كان، أنا فكرة إن أنا أجي مدير فني مبجيش مع حد، ثم أنا لو النادي الأهلي عايزني، أنا هعمل عقد رسمي بسنتين وفي شرط جزائي، يعني أنا عقد رسمي وسنتين، لأن أنا هسيب سيراميكا، وأنا مستقر هناك”.