الرياضة

تحدث الإعلامي سيف زاهر، عن تفاصيل المشادة الكلامية، التي حدثت بين محمد هاني لاعب نادي الأهلي، والحكم محمد معروف خلال مباراة فاركو.

أزمة محمد هاني مع الحكم محمد معروف

قال سيف زاهر: "اتكلمت مع محمد هاني عن أزمة طرده من الحكم محمد معروف وقالي القصه من بداياتها خالص، أنه حصل فاول في البداية، فقام قال: "يعني حضرتك شايف إن دي فاول؟" كلام طبيعي جدًا، فكابتن معروف مطلع إنذار وقاله "وأنا هطردك"".

وتابع عبر برنامج ملعب أون: "محمد هاني اعترض وقال: "يا كابتن بعد إذن حضرتك، أنت بتكلمني ليه كده؟" فرد الحكم: "خلي بالك أنا عرباوي"، فرد هاني: "إحنا في الملعب، إيه علاقتي بالموضوع ده؟ كلمني بطريقة كويسة"
الحكم قال: "خلي بالك الإنذار اللي جاي هيكون طرد"، بعد كده مفيش أي كلام ولا حاجة لحد ما جه وقت التغيير".

وواصل: "لحظة التغيير، محمد هاني بيحكي: "أنا طالع أجري عشان أسلم على اللي نازل، مش بضيع وقت وكل اللاعيبة طلعوا من نفس المكان"، الحكم فجأة قاله: "الطلوع من هنا" (الناحية التانية)، هاني رد: "يا كابتن أنا هطلع من هنا أسلم على اللي هيتغير"، الحكم راح لافف ومديله كارت أحمر".

تصريحات سيف زاهر عن محمد هاني

وأكمل: “هاني قال: “أنا حسيت إن أنا بحلم، ومصدقتش أنا عملت إيه؟ طالع أجري أسلم على الراجل”، بعد الكارت الأحمر، وقف مصدوم دقيقة وساب الملعب من غير ما يقول كلمة”.

وذكر: “هاني وقف برة الملعب بيتفرج لحد نهاية المباراة وبعد الماتش دخل أوضة اللبس، لا استناه ولا اتكلم مع الحكم، ومفيش أي حديث بينهم”.
وأتم سيف زاهر حديثه: “الوحيد اللي اتكلم معاه بعد المباراة هو الكابتن محمد يوسف المدير الرياضي للنادي الأهلي، واللي اتقال هو رواية محمد هاني بالنص، خطوة بخطوة، سطر بسطر”.