قامت الفنانة بسنت صيام بـ إهداء عمرة للفنانة الراحلة سعاد حسني، التي كانت توعدها منذ وفاتها.
كتبت بسنت صيام منشور على حسابها الشخصي بموقع التواصل الاجتماعي تبادل الصور والفيديو الانستجرام:"وعدت ووفيت يا ست سعاد.. الحمد لله و ربنا يتقبل العمرة التانية اللي عملتها كانت لسعاد حسني وعد كنت وعدته من و أنا صغيرة ان اول ما ربنا يكتبلي عمرة هعملها واحدة، حبي ليها مش حب عادي اللي يعرفني عارف ان بيتي كله صورها عندي لبس و شنط و حاجات كتير عليها صورها".
أضافت بسنت حديثها:"أنا حبيت الفن منها و أنا صغيرة كنت عايزة أمثل عشان أمثل افلامها بس مش هو ده الحب أنا بحبها اللي هو ديماً بترحم عليها و ادعيلها و اقرالها قرآن و طول عمري شايفة اني معنديش هدية اكبر ولا احلى من العمرة اهديها بيها و الحاجة الوحيد اللي ممكن تكون هي محتاجاها و كمان هي معندهاش أولاد و للأسف على قد ما الناس كلها بتحبها الناس مبتفتكرش تترحم ولا تدعي للفنانين معرفش ليه".
تابعت:"أنا مكنتش ناوية اتكلم في الموضوع ده عشان دي حاجة بيني و بينها و بين ربنا بس بقالي شوية بضايق و بستغرب اوى ازاي الناس تكون بتحب فنان او فنانة اوى و يجروا عشان يتصوروا معاهم و في نفس الوقت يقطعوا فيهم و يشتموهم و يستحلوا الكلام في عرضهم كدة… بجد حاجة مخى مش فاهمها".
واختتمت بسنت صيام حديثها، قائلة: “كله كوم بقى و لما يبقى الكلام ده على حد أتوفي و الفكرة ان ديماً الناس دي بتتكلم بالدين طب ده حتى الدين بيقول أذكروا محاسن موتاكم، نفسي تاخدوها حاجة كدة و انتوا بتتفرجوا على التليفزيون ولقيته ممثل بتحبوه و توفى خدوا عشر ثواني اقروله الفاتحة و لو يا سيدي شايف ان اللي بيعمله حرام قول لنفسك كدة معناه انه محتاج الدعوة اكتر, ربنا يرحمك يا زوزو و يتقبل مني و يجعلها في ميزان حسناتك يا رب”.