صرح الحارس مصطفى شوبير حارس مرمى النادي الأهلي ومنتخب مصر عبر برنامج ملعب أون تايم مع الإعلامي سيف زاهر
وقال مصطفى شوبير:"بطولة إفريقيا صعبة والموقف كله صعب خاصة بعد إصابة حارس كبير مثل الشناوي وبدأت وقت بطولة السوبر في الإمارات , وبعد 5 مباريات بدأت أتأقلم مع الفريق خلاص وكل اللاعبين بلا استثناء دعمتني , والجهاز الفني قالي بعد إصابة الشناوي أن لو تعاقدنا مع حارس سيكون الحارس الثاني ليك وأنت الحارس الأساسي , وكولر أكد أن أي حارس سيتم التعاقد معاه مهما كان اسمه سيكون الحارس رقم 2 , وهدفي منذ الصعود للفريق الأول هو المشاركة أساسيا مع الفريق والمنتخب الأول خاصة بعد الظلم اللي إتعرضتله في أمم إفريقيا تحت 23 سنة مع الكابتن شوقي غريب"
وأضاف شوبير:"كرم ربنا وتوفيقه مساندني منذ أول دقيقة شاركت بها مع الفريق , والواحد ماشي بشكل كويس وسعيد كوني جزء من النادي الأهلي وساهمت في الفوز بالأميرة الإفريقية رقم 12 , وفخولا إني إبن أحمد شوبير, والفضل يرجع لوالدي ووالدتي , وفي وقت من الأوقات كوني ابن شوبير كان ظالم بالنسبالي والناس بتحاسبني علشان والدي مع علشان كوني مصطفى , وساعات بحس أنه شايل همي أكتر مني وأكنه هو اللي بيوقف في الجون مش أنا من كتر الضغوطات اللي بيشيلها بالنيابة عني , وفي الأول وفي الأخر ده شغلي , وأفضل أن الكابتن شوبير يتكلم عني لكونه إعلامي وكونه والدي في الأخير"
وتابع شوبير:"والدي بيفرح لما الناس بتتكلم عني كويس , ووالدي ووالدتي هما أكثر ناس بتتأثر بالإنتقادات , بس الفرق أن والدي مر بالمواقف ديه كتير وقادر يتعامل معاها وعاطفتهم بتغلب عليهم في الأخر , ومش ناسي موقف والدي معايا بعد نهائي الكأس لما الجمهور كان بينادي عليا وهو زقني ناحيتهم وهو كان بيقف حارس وعاش اللحظات ديه كتير وعارف أهميتها"