شوبير لإدارة الأهلي بعد مهاجمة التيشرت الجديد: حطوا قطن في ودانكم وشوفوا شغلكم واعملوا الصح

وجه الإعلامي أحمد شوبير حارس مرمى الأهلي ومنتخب مصر السابق رسالة قوية وصريحة لمسؤولي النادي الأهلي ومجلس إدارة النادي برئاسة محمود الخطيب، بعد اعتراض البعض مؤخرًا على القميص الجديد وتغيير شعار النادي.

وقال أحمد شوبير في تصريحات له اليوم الأربعاء 5 أكتوبر 2022 :«الأهلي اتفق مع إحدى الشركات على ملابس الفريق الجديدة وأعلن عن القميص الجديد عبر حساباته الرسمية على مواقع التواصل الاجتماعي، ولكن مش عارف ليه دائما بندخل دائما في دوامة وأزمة لما أي حد يكتب كلمتين على السوشيال ميديا ولا بعض الجماهير تتكلم».

وتابع أحمد شوبير: «كلمة ونصيحة لإدارة الأهلي.. اعملوا الصح اعملوا اللي لصالح الأهلي مش كل حملة تتعمل على السوشيال ولا كل واحد يقول كلمتين تتأثر وتخلي قراراتكم تتغير، طالما شايف إنك بتراعي مصالح النادي توكل على الله».

وأضاف شوبير: «لأنه طول ما انت فاتح الباب للجمهور ده يقول وده يبدي رأيه وده زعلان وده مضايق الكلام كده لا بيقدم ولا بيأخر، وأنا كمان كنادٍ محتاج فلوس ودخل ويكون ليه براند، كفاية يا جماعة، وفيه ناس لازم ما تتدخلش في اللي ملهاش فيه وانتي يا إدارة حطي قطن في ودانك وشوفي شغلك».