عفى الله عما سلف.. أول تعليق من أحمد السقا على تصريحات مها أحمد

الإثنين، 17 مايو 2021 03:07 م

علق النجم أحمد السقا لأول مرة على أزمة الفنانة مها أحمد الأخيرة، بعد أن وصفته والنجم أمير كرارة بـ "الكومبارس"، و"مخدماتية للأستاذة"، والتى أثارت جدلًا كبيرا داخل الوسط الفني.

وكتب أحمد السقا عبر حسابه على موقع التواصل الإجتماعي "فيسبوك":" العشرة بتحكم الواحد .. والعيش والملح عقد .. وعفى الله عما سلف يا أختي العزيزة مها".

وكانت مها أحمد قد كتبت عبر حسابها على موقع التواصل الإجتماعي "فيسبوك":" عوضي على الله دى الجملة اللى دايما بقولها لما اتصدم في أشخاص، الحكاية يا سادة نجمين عملوا مسلسل واتنجمت عليهم بنوتة لسه ألف باء تمثيل واديتهم على قفاهم وركبت عليهم إلى أن أصبحت بطلة المسلسل وبطلة الدعاية للمسلسل وهما راضيين رغم إن طول عمرهم مبيعملوش كده مع أي زميلة لهم أقربها أنا".

وتابعت:" النجم الأولاني بينى وبينه عيش وملح وزمالة، رشحت في مسلسل بطولته وكان بيقنعني بدور ولما وافقت بعتولي دور تاني معرفوش، دور متعملوش واحدة مبتدئة، المفروض إنه عارف قيمتى الفنية وعارف إنى إضافة له، اتهرب مني وموقفش جنبى وباعني رغم إن الكل عارف إنى زي أخته.. ندل".

وأضافت:"التانى كان في بداياته يتمنى يسلم عليا ويقولى يا أستاذة، نزلت من نفسى وقلتله مش هنشتغل مع بعض ما هى الحوجة مرة، رد وقالى الدور بينادي صاحبه طبعا محتلكوش قد ايه ندمت نفسى وعشت أسود أيام حياتى عياط واكتئاب وقلت عوضى عليك يا رب".

واستكملت:"تمر الأيام والاتنين يعملوا ويتجمعوا مع بعض في مسلسل واحد (على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوتة سنة أولى تمثيل وخبرة ويتحول المسلسل والدعاية الدراما كاملة لصالحها وهما (مخدماتية للأستاذة)".

واختتمت:"يمهل ولا يهمل، ابدأوا من جديد يا أوفر تمثيل ياللى مبتقروش يا كمبارس جنب النجمة. نصيحة بلاش تتشطروا على اللى كان بينكم وبينهم عيش وملح بلاش تتشطروا على أساتذتكوا. عوضنا على الله. يارب متحوجنا لحد حتى ولو كان أقرب الناس لينا".